29 avqust 2025-ci il tarixində Masallı rayon İcra Hakimiyyətinin inzibati binasında Ərazi idarəetmə və yerli özünüidarəetmə orqanları ilə iş şöbəsinin müdiri Nahid Həsənovun təşkilatçılığı ilə geniş tərkibli iclas keçirilib.

Toplantıda şöbənin baş məsləhətçisi Zahid Sadıxov, həmçinin rayon üzrə ərazi nümayəndəliklərinin müavinləri və baş məsləhətçi–baş mühasibləri iştirak ediblər.

İclasda gündəlikdə duran bir sıra vacib məsələlər müzakirə olunub. Qaldırılan mövzular əsasən vətəndaşların gündəlik qayğı və problemlərinin həlli, habelə rayon üzrə idarəetmənin səmərəliliyinin artırılmasına yönəlib.

Müzakirə olunan məsələlər arasında:
• şəhid ailələrinin problemlərinin həlli və onların sosial müdafiəsinin gücləndirilməsi,
• tənha yaşayan vətəndaşlara diqqətin artırılması,
• mübahisəli torpaq sahələri ilə bağlı məsələlər,
• küçə ticarətinin tənzimlənməsi,
• sahibsiz itlərin aradan qaldırılması,
• kommunal təsərrüfat (zibillərin vaxtında yığılması və daşınması),
• qanunsuz tikililərin qarşısının alınması,
• sığorta məsələləri,
• bələdiyyələrlə vətəndaşların görüşlərinin təşkili,
• küçələrin işıqlandırılması,
• səfərbərlik işlərinin icrası,
• şəhid plakatlarının yenilənməsi və qorunması,
• erkən nikah hallarının qarşısının alınması,
• ərazilərdə baş verən hadisələr barədə vaxtında məlumat verilməsi,
• kanalların təmizlənməsi və qazılması,
• təhlükəsizlik qaydalarına əməl olunması,
• kargüzarlıq işlərinin düzgün təşkili

kimi mövzular xüsusi diqqət mərkəzində olub.

İclasda həmçinin ərazi nümayəndəliklərinin qarşısında konkret tapşırıqlar qoyulub, problemlərin operativ həlli üçün əlaqələndirilmiş işin vacibliyi vurğulanıb.

Masallı rayon İcra Hakimiyyəti tərəfindən bu cür görüşlərin mütəmadi keçirilməsinin vətəndaşların sosial rifahının təmin olunmasına, habelə yerli idarəetmənin daha çevik fəaliyyət göstərməsinə xidmət etdiyi bildirilib.