Bazar günü olmasına baxmayaraq, şəhid ailələrinə göstərilən diqqət və qayğı davam etdirilir.

Milli Məclisin deputatı Məşhur Məmmədovun tapşırığına əsasən, köməkçiləri Əli Nağıyev və Rəmzi Şahverdiyev tərəfindən Masallı rayonunun Hüseynhacılı kəndində I Qarabağ müharibəsi şəhidi Ətrafil Mürüvvət oğlu Məmmədovun anım günü ilə əlaqədar ailəsi ziyarət olundu.

Ziyarət zamanı şəhid ailəsinə deputatın səmimi salamları və xoş arzuları çatdırıldı. Şəhid atası Mürüvvət kişi ilə iki saata yaxın davam edən söhbət dərin mənəvi məna daşıyırdı – burada həm bir övlad itkisini yaşayan ata kədəri, həm də Vətənə olan sonsuz sevginin izləri duyulurdu.

Görüş zamanı ailənin gündəlik qayğıları, mövcud vəziyyəti ilə yaxından maraqlanıldı, şəhidin xatirəsi ehtiramla anıldı.

Bu cür ziyarətlər bir daha sübut edir ki, şəhidlərimizin ailələrinə diqqət göstərmək sadəcə mənəvi borc deyil – bu, xalqımızın yaddaşında, dövlətimizin siyasətində və hər bir vətənsevər insanın qəlbində yaşayan müqəddəs bir məsuliyyətdir.