Masallı rayonunun Ərkivan qəsəbəsində Ərazi Nümayəndəliyinin, qəsəbə Bələdiyyəsinin, Sənətkarlıq evinin və “Ərkivan Xeyriyyə Cəmiyyəti”nin birgə təşkilatçılığı ilə 8 noyabr – Zəfər gününə həsr edilən bayram tədbiri keçirilib.

AzadMedia.az xəbər verir ki, bayram tədbirində şəhid ailələri, qazilər, ziyalılar, qəsəbə ictimayəti iştirak edib.

Tədbir iştirakçıları Ərkivan Şəhidlər Parkında ucaldılan abidə kompleksini ziyarət edərək, qarşısına gül dəstələri düzüblər.
Sonra torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

Çıxış edən Ərkivan Xeyriyyə Cəmiyyətinin sədri Cəfər Cəfərov, jurnalist-publisist Akif Ağayev, Masallı Rayon Müharibə, Əmək, Silahlı Qüvvələr Təşkilatının sədr müavini Ədalət Hüseynov, din xadimi Hacı Gündüz Abbasov və digərləri xalqımızı Zəfər Günü münasibəti ilə təbrik edərək, Müzəffər Ali Baş Komandan İlham Əliyevin rəhbərliyi altında 44 gün davam edən Vətən müharibəsində ərkivanlı igidlərin də mərdliklə döyüşərək, torpaqlarımızın azad olunmasında şücaət göstərdiklərini qeyd ediblər.

Qəsəbə məktəbliləri şəhidlərə, vətənə, torpağa həsr edilən şeirlər söyləyib, ədəbi-bədii kompozisiyalar nümayiş etdiriblər.