Azərbaycanın yaxın siyasi tarixində uzun illər “boz kardinal” kimi tanınan Ramiz Mehdiyev barədə verilmiş məhkəmə qərarı həm simvolik, həm də siyasi mənada yeni mərhələnin başlanğıcı kimi qiymətləndirilir. Səbail Rayon Məhkəməsinin qərarına əsasən, Azərbaycan Milli Elmlər Akademiyasının keçmiş prezidenti, Prezident Administrasiyasının sabiq rəhbəri Ramiz Ənvər oğlu Mehdiyev barəsində Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2 (cinayət yolu ilə əldə edilmiş əmlakı leqallaşdırma) maddələri ilə ittiham irəli sürülüb.

Bu, təkcə bir şəxsin deyil, illərlə kölgədə dövlət idarəçiliyinə təsir göstərmiş köhnə sistemin və onun simvollarının sonudur.

“Boz kardinal” mifi dağılır

Ramiz Mehdiyev uzun illər dövlət aparatının ən mühüm sütunlarından biri kimi fəaliyyət göstərib. Onun adı siyasi qərarların arxasında, kadr dəyişikliklərində və mətbuatla münasibətlərdə gizli, lakin təsirli fiqur kimi çəkilirdi.
Məhz bu səbəbdən cəmiyyət və ekspertlər onu “boz kardinal” adlandırırdı.

Ancaq son illər Azərbaycanın siyasi həyatında köklü islahatlar, sistemin şəffaflaşması və köhnə idarəetmə modellərinin sıradan çıxarılması prosesi Mehdiyev kimi fiqurların təsir imkanlarını sıfırladı. Bu prosesin kulminasiyası indi hüquqi müstəviyə keçib.


Cinayət maddələrinin ağırlığı diqqət çəkir, İttihamlar təsadüfi deyil.

278.1-ci maddə – dövlət hakimiyyətini zorla ələ keçirməyə cəhd – ən ağır siyasi cinayətlərdən biridir.

274-cü maddə – dövlətə xəyanət – yalnız milli təhlükəsizlik orqanlarının çox ciddi sübutlar əsasında irəli sürdüyü ittiham sayılır.

193-1.3.2-ci maddə – cinayət yolu ilə əldə edilmiş əmlakın leqallaşdırılması – illərlə yığılan böyük maliyyə mexanizminin araşdırıldığını göstərir.


Bu maddələrin sanksiyası ömürlük azadlıqdan məhrum etməyə qədər uzanır. Hərçənd, Mehdiyevin yaşı və səhhəti nəzərə alınaraq məhkəmə onu 4 ay müddətinə ev dustaqlığına göndərib.

Dövlətin siyasi iradəsi və islahatların davamı

Bu hadisə, əslində, Azərbaycanın son illər apardığı dərin siyasi təmizlənmə prosesinin növbəti mərhələsi kimi dəyərləndirilə bilər. Prezident İlham Əliyevin rəhbərliyi ilə dövlət idarəçiliyində köhnə, qapalı və qeyri-şəffaf sistemin qalıqları tədricən aradan qaldırılır.
Ramiz Mehdiyevin həbsi bir mesajdır:
heç kim toxunulmaz deyil.

Əgər bu qədər illər sistemin dərin qatlarında mühüm rol oynamış, ən yüksək vəzifələrdə çalışmış bir şəxs belə qanun qarşısında cavab verməli olursa, deməli, ölkədə yeni siyasi etika və məsuliyyət dövrü başlanıb.

Həbslər arta bilərmi?

Ekspertlərin fikrincə, Mehdiyev işi zəncirvari reaksiyaya səbəb ola bilər. Onunla bağlı istintaq materiallarında keçmişdən gələn əlaqələr, maliyyə əməliyyatları və gizli şəbəkələrin adları yer alır.
Bu isə o deməkdir ki, istintaq genişləndikcə, yaxın çevrəsindəki şəxslər, həm də bəzi keçmiş dövlət məmurları istintaqa cəlb oluna bilər.

Bu proses bir tərəfdən ədalətin bərpası, digər tərəfdən siyasi sistemdə tam şəffaflığın bərqərar olunması istiqamətində atılan addım kimi görünür.

Ramiz Mehdiyevin ev dustaqlığı ilə bağlı qərar yalnız hüquqi hadisə deyil – bu, ideoloji və siyasi dövranın sonudur.
Azərbaycan artıq “boz kardinal”ların deyil, qanunun, şəffaflığın və məsuliyyətin hökm sürdüyü bir dövlət modeli qurur.

Bu işin istintaqı davam etdikcə, yeni adların və faktların üzə çıxması gözləniləndir.
Cəmiyyət isə uzun illər kölgədə qalmış mifik fiqurların gerçək mahiyyətini indi daha aydın görür: boz kardinalın çöküşü – köhnə sistemin son akkordudur.
Elnurə