Gənc hüquqşünaslarda cinayət, cinayət-prosessual hüquq sahələrində hüquqi biliklərinın artmasına, praktiki bacarıqlarının formalaşmasına töhfə verilməsi, eləcə də prokurorluq orqanları ilə hüquq ictimaiyyəti arasında əməkdaşlıq əlaqələrinin genişləndirilməsi məqsədilə Baş Prokurorluq tərəfindən müvafiq tədbirlərin görülməsi davam etməkdədir.
Bu tədbirlər çərçivəsində cari ilin 4 noyabrında “Davam” Gənclər Hərəkatının nəzdində olan “Davam” Gənc Hüquqşünaslar Klubu üzvlərinin Baş Prokurorluğun yeni inzibati bina kompleksinə tanışlıq səfəri təşkil edilmiş, əyani şəkildə onlara prokurorluğunun fəaliyyəti ilə bağlı ətraflı məlumatların verilməsi təmin olunmuşdur.
Qeyd edilməlidir ki, “Davam” Gənc Hüquqşünaslar Klubunun məqsədi həm gənc hüquqşünasları, həm də qeyri-hüquq ixtisasında olan gəncləri Azərbaycanın hüquq sistemi ilə tanış etmək və onları bu sahə ilə bağlı maarifləndirməkdir.
Qonaqlar ilk öncə yeni inzibati binada Ulu Öndər Heydər Əliyevin əziz xatirəsinə həsr edilmiş guşə və kitabxana ilə yaxından tanış olmuşlar.
44 günlük Vətən müharibəsinə həsr olunmuş tarixi-memorial qalereya, Elm-Tədris Mərkəzinin mühazirə, praktiki məşğələlər və iclas zalları, kriminalistika otaqları ilə tanışlıq qonaqlarda zəngin təəssüratlar yaratmışdır.
Daha sonra Hərəkatın üzvləri cinayət prosesi iştirakçılarının dindirilməsi üçün nəzərdə tutulmuş, müasir tələblərə cavab verən dindirmə otaqları, cinayət prosesual qanunvericiliyin tələblərinə müvafiq olaraq tanıyan şəxsin təhlükəsizliyinin təmin edilməsi məqsədilə tanınmanı vizual müşahidəni istisna edən şəraitdə aparmağa imkan verən istintaq otağı ilə tanış olmuşlar.
Tanışlıq səfəri çərçivəsində qonaqlara prokurorluq orqanlarının əsas fəaliyyət istiqamətləri, həyata keçirilən islahatlar, habelə qarşıda duran prioritet məqsədlər
barədə ətraflı məlumat verilmişdir.
Tədbirin yekununda xatirə fotoşəkili çəkilmişdir.