İsraildə Qəzza müharibəsinə dair səsləndirilən nadir tənqidlərdən biri bu həftə ölkədə siyasi təlatümə səbəb oldu. İsrailin mərkəz-sol qanadından olan tanınmış müxalifət lideri və keçmiş ordu generalı Yair Golan, hökumətin Qəzzada apardığı hərbi əməliyyatları sərt dillə tənqid edərək, “ağıllı bir dövlət mülki əhaliyə qarşı vuruşmaz, körpələri hobbiyə çevrilmiş şəkildə öldürməz və bir əhalini sürgün etməyi özünə məqsəd qoymaz” ifadələrini işlətdi. Bu sözlər həm ölkə daxilində, həm də beynəlxalq mediada ciddi rezonans doğurdu.
Golanın bu cür sərt çıxışı İsrail cəmiyyətində sarsıdıcı təsir bağışladı. Çünki müharibənin başladığı 7 oktyabr 2023-cü ildən bəri ölkədə ictimai rəy əsasən HƏMAS-ın hücumları, girovların saxlanılması və İsrail əsgərlərinin itkiləri üzərində qurulub. Fələstinli mülki vətəndaşların yaşadıqları humanitar böhran və böyük itkilər isə demək olar ki, ictimai diskursda arxa planda qalır.

Yair Golan daha sonra açıqlama verərək, dediklərinin İsrail əsgərlərinə yox, hökumətdəki radikal sağçı qüvvələrin siyasətinə yönəldiyini bildirsə də, onun fikirləri ölkənin siyasi spektrində nadir rast gəlinən bir səs olaraq yadda qaldı.
Hazırda İsrailin Qəzzadakı hərbi əməliyyatları nəticəsində 53 mindən çox insanın həyatını itirdiyi, əhalinin isə 90%-nin evsiz qaldığı və aclıqla üz-üzə gəldiyi bildirilir. Yerli və beynəlxalq hüquq müdafiə təşkilatları bu əməliyyatları insan hüquqlarının pozulması kimi qiymətləndirir, lakin İsrail daxilində bu məsələlərə dair açıq müzakirələr çox az səslənir.
Mütəxəssislər bildirirlər ki, Golanın açıqlaması İsrail cəmiyyətində “müharibənin mənəvi sərhədləri” ilə bağlı daha geniş və çətin sualları gündəmə gətirə bilər. Lakin bu suallar hələlik İsrail cəmiyyətinin əsas axın medianın və siyasi dairələrinin gündəminə daxil olmaqda çətinlik çəkir.