İtaliyanın Kastel Qandolfo şəhərində yerləşən yay iqamətgahında çıxış edən Roma Papası XIV Leo Qəzza zolağında davam edən müharibəyə dərhal son qoyulması üçün beynəlxalq ictimaiyyətə çağırış edib. O, İsrail ordusunun Qəzza şəhərindəki Müqəddəs Ailə Katolik kilsəsinə hücumunu kəskin şəkildə qınayıb. Hücum nəticəsində üç xristian – Saad İssa Kostandi Salame, Foumia İssa Latif Ayyad və Najwa İbrahim Latif Əbu Daud – həlak olub, bir neçə nəfər isə yaralanıb.

Roma Papası həmçinin Yaxın Şərqdə yaşayan xristianlara müraciət edərək, onların inamlı mövqeyini yüksək qiymətləndirib və qeyd edib ki, “Siz papanın və bütün kilsənin qəlbindəsiniz.”

Pontifik bildirib ki, kilsənin yerləşdiyi ərazi münaqişədən qorunmaq istəyən yüzlərlə mülki vətəndaş üçün sığınacaq rolunu oynayırdı. O, beynəlxalq hüququn və insan haqlarının qorunmasının vacibliyini vurğulayaraq, kollektiv cəzalandırma, qeyri-mütənasib güc tətbiqi və məcburi köçürmələrin yolverilməz olduğunu qeyd edib. Papa Yaxın Şərqdə yaşayan xristian icmasına da dəstəyini ifadə edərək, onların inam və səbirli mövqeyini alqışlayıb.