İyulun 23-də Ukrayna və Rusiya nümayəndə heyətləri İstanbulda danışıqlar masası arxasına keçib. Türkiyənin vasitəçiliyi ilə təşkil olunan görüş, iki ölkə arasında davam edən hərbi toqquşmaların fonunda baş tutub.

Görüş zamanı əsas diqqət atəşkəsə nail olunması, əsir mübadiləsi, mülki əhalinin müdafiəsi və humanitar dəhlizlərin açılmasına yönəlib. Bu, son bir neçə ayda tərəflər arasında keçirilən sayca üçüncü birbaşa görüşdür.

Ukrayna tərəfi rəsmi bəyanatında ölkənin dərhal atəşkəsə hazır olduğunu və Rusiya tərəfindən konstruktiv, real yanaşma gözlədiyini bildirib. Prezident Volodimir Zelenski, görüşün nəticələrini şəxsən izlədiyini və tərəflər arasında əldə olunacaq hər bir razılaşmanın hüquq və ədalət əsasında qurulmasının vacibliyini vurğulayıb.

Rusiya nümayəndə heyətinin rəhbəri Vladimir Medinski isə bildirib ki, Moskva üçün liderlərin birbaşa görüşü yalnız konkret razılaşdırılmış sənədlərin imzalanması üçün nəzərdə tutulmalıdır.

Görüşdə əsir və girov mübadiləsi məsələləri də əsas müzakirə mövzusu olub. Ukrayna, xüsusilə mülki şəxslərin, o cümlədən uşaqların qaytarılmasını prioritet sayır. Rusiya isə bəzi təqdim olunmuş siyahılarda şəxslərin artıq yetkinlik yaşında olduğunu əsas gətirərək müzakirələrə ehtiyatla yanaşır.

Görüşün növbəti mərhələsinin avqustun ilk günlərində keçirilməsi planlaşdırılır. Bu mərhələdə tərəflərin hüquqi sənədlərin hazırlanması və razılaşdırılması istiqamətində konkret addımlar atması gözlənilir.