Vaşinqtonda daha bir diqqətçəkən layihə gündəmdədir. Ağ Ev rəhbərliyi, Prezident Donald Trampın təşəbbüsü ilə 200 milyon dollarlıq yeni bal zalının inşasına sentyabr ayında başlanacağını açıqlayıb. Tikintinin 2029-cu ilə — Trampın ikinci prezidentlik müddətinin sonuna qədər tamamlanması planlaşdırılır.

Bu, Truman dövründən bəri Ağ Evə edilən ilk əsas struktur dəyişikliyi olacaq. Tramp administrasiyası zalın tamamilə özəl vəsait hesabına inşa olunacağını bildirir. Layihənin maliyyələşdirilməsi üçün Prezident Trampla yanaşı, digər donorlar da dəstək verəcək.

Ağ Ev sözçüsü Karolin Leavitt, yeni 90 min kvadrat futluq — təxminən 8 min kvadratmetrlik — məkanın böyük tədbirlər, dövlət qəbulları və rəsmi ziyafətlər üçün mükəmməl şərait yaradacağını deyib. Hazırda ən böyük salon olan Şərq otağı cəmi 200 nəfərlikdir. Bu isə keçmişdə böyük tədbirlər zamanı çadırlardan istifadəyə səbəb olub.

Prezident Tramp isə layihəni “150 ildən bəri gözlənilən bir miras” adlandırıb. Onun sözlərinə görə, Ağ Evin ətrafında keçmiş tədbirlər zamanı yağan yağış və çətin şərait qonaqlara narahatlıq yaradıb. Yeni zal isə müasir standartlara uyğun, Vaşinqton abidəsinə mənzərəsi olan və mövcud binaya hörmətlə yanaşan bir arxitekturaya sahib olacaq.

Layihə artıq ilkin mərhələyə keçib, memar və mühəndis komandaları formalaşdırılıb. Ağ Evdən verilən məlumata görə, zal gələcək nəsillər üçün də istifadə edilə biləcək önəmli tarixi irs olacaq.