Almatıda yerləşən BMT-nin yeni Regional Mərkəzi Mərkəzi Asiya ölkələri və Əfqanıstan üçün Dayanıqlı İnkişaf Məqsədlərinə çatmaq istiqamətində əməkdaşlığın gücləndirilməsini hədəfləyir. Bu barədə Almatıda keçirilən rəsmi mərasimdə BMT Baş katibi Antonio Quterreş məlumat verib.

Yeni yaradılan mərkəz hökumətlər, BMT ölkə komandaları, vətəndaş cəmiyyəti, akademik çevrələr, özəl sektor və beynəlxalq maliyyə institutlarını bir araya gətirərək, iqlim dəyişikliyi, su qıtlığı, gender bərabərsizliyi və rəqəmsal ayrı-seçkilik kimi çağırışlara qarşı koordinasiyalı şəkildə mübarizə aparacaq.

Quterreş qeyd edib ki, bu mərkəz regional əməkdaşlığın gücləndirilməsi, yeni ideyaların mübadiləsi və ortaq həllərin tətbiqi baxımından əhəmiyyətli platformaya çevriləcək. Onun sözlərinə görə, mərkəz həm də Əfqanıstanın dayanıqlı inkişaf yolunda irəliləməsinə, insan hüquqlarına hörmətin və iqtisadi dayanıqlığın təmin olunmasına töhfə verəcək.

Qazaxıstan Prezidenti Kasım-Jomart Tokayevin iştirakı ilə baş tutan imzalanma mərasimində çıxış edən BMT Baş katibi Qazaxıstanın regional liderliyini, nüvə silahlarından könüllü imtina qərarını və sülhə verdiyi töhfəni yüksək qiymətləndirib.

Yeni mərkəz BMT-nin regional səviyyədə fəaliyyətini gücləndirəcək və 2030 Gündəliyinin həyata keçirilməsində Mərkəzi Asiya ölkələri üçün strateji dayaq rolunu oynayacaq.