İsrailin milli təhlükəsizlik naziri İtamar Ben-Qvir bazar günü Qüdsdəki Müqəddəs Məkan kompleksində çıxış edərək, Həmasın girov Evyatar Davidin görüntülərini yayımlamasını “dövləti təzyiq altına alma cəhdi” kimi qiymətləndirib. O, Qəzza zolağının tam ələ keçirilməsini, Həmas üzvlərinin aradan qaldırılmasını və bölgədə könüllü miqrasiyanın təşviqini tələb edib .

"Bu dəhşətli Həmas videolarının arxasında bir məqsəd dayanır: İsrailə təzyiq göstərmək. Mən buradan suverenliyin və idarəçiliyin sübut edildiyi Məscidül-Əqsa ərazisindən bildirirəm ki, bu gündən etibarən Qəzza tam fəth edilməli, Həmasdan təmizlənməli və könüllü emiqrasiya təşviq olunmalıdır."

Eyni gündə İsrailin baş naziri Benyamin Netanyahu yayılan videoları “dəhşətli” adlandıraraq, Həmasın girovlara qarşı davranışını nasistlərin yəhudilərə etdiklərinə bənzətdi. O bildirdi ki, bu görüntülər İsrailin iradəsini qıra bilməz və ölkə Həması tam məhv etməkdə qətiyyətlidir.

Ötən şənbə Tel-Əvivdə on minlərlə insan girovların azad olunması və atəşkəs danışıqlarının bərpası üçün hökumətə çağırış etdi.

Həmas və İslami Cihadın yayımladığı görüntülərdə iki israilli girovun ağır vəziyyətdə, ac və zəif düşmüş olduğu görünür. Ekspertlər bu materialları zorla və təbliğat məqsədilə çəkilmiş kimi qiymətləndirir.

BMT və beynəlxalq təşkilatlar isə Qəzzada vəziyyətin acınacaqlı olduğunu bildirir. Artıq bölgəyə məhdud humanitar fasilələrlə yardımların çatdırılmasına başlanılıb. Oktyabrın 7-də qaçırılan 251 nəfərdən yalnız 20-sinin sağ olduğu düşünülür.