Gürcüstanda erkən insan tarixini yenidən yazan mühüm bir kəşf edilib. Orozmani arxeoloji ərazisində 1.8 milyon il əvvələ aid insan çənə sümüyü və iki sağlam diş tapılıb. Bu tapıntı, Afrikadan Avrasiyaya ilk insan köçləri haqqında məlum olan bilikləri genişləndirir.

Fosil, dünya miqyasında tanınmış Dmanisi arxeoloji ərazisindən cəmi 20 kilometr aralıda aşkarlanıb. Dmanisi, Afrikadan kənarda indiyə qədər tapılmış ən qədim Homo erectus qalıqları ilə məşhurdur. Bu son tapıntı, həmin bölgədə insan yaşamının miqyasını və dövrünü daha da dəqiqləşdirir.

Orozmani qazıntılarına rəhbərlik edən arxeoloq Corc Bidzinaşvili bildirir ki, bu çənə sümüyü erkən hominidlərin yaşadığı mühit, həyat tərzi və regionda nə qədər müddət qaldıqları barədə dəyərli məlumatlar verir. Onun sözlərinə görə, bu ərazi hominidlərin Avrasiyaya yayılmağa başladığı ilk məkanlardan biri ola bilər.

Ərazidə ilk heyvan qalıqları 1960-cı illərdə tapılmışdı, lakin yalnız 2019-cu ildən sistemli arxeoloji qazıntılara başlanılıb. 2022-ci ildə eyni ərazidə tapılan qədim diş fosili, burada daha ciddi insan izlərinin olduğunu göstərmişdi.

Yeni tapıntını üzə çıxaran ABŞ-ın Scripps Kollecindən tələbə Cülyet ZUNiga bu kəşfi təsadüfən edib. Onun sözlərinə görə, Orozmani sahəsi insan təkamülü haqqında böyük məlumat potensialına malikdir.

Tədqiqatçılar bu və digər tapıntıların erkən insanların genetik qrupları, həyat tərzi və Avrasiyaya yayılma yolları barədə mübahisəli suallara aydınlıq gətirəcəyini ümid edir. Bu kəşf insanlığın “ilk addımları”nın izlərini ortaya çıxarmağa davam edir.