Avropa İttifaqının Copernicus İqlim Dəyişikliyi Xidmətinin hesabatına görə, 2025-ci ilin iyul ayı müşahidə tarixində üçüncü ən isti iyul kimi qeydə alınıb.

Hesabata görə, 2024-cü ilin avqustundan 2025-ci ilin iyuluna qədərki 12 aylıq dövrdə orta temperatur sənayeləşmə öncəsi dövrə nisbətdə 1,53°C yüksəlib. Bu göstərici 2015-ci il Paris İqlim Sazişində nəzərdə tutulan 1,5°C-lik qlobal istiləşmə həddini aşır.

Hesabatda bildirilir ki, bu il iyul ayı 2023 və 2024-cü illərdə qeydə alınmış ən isti iki iyuldan daha sərin olsa da, dünya üzrə ekstremal iqlim hadisələri davam edib. Məsələn, 25 iyulda Türkiyə 50,5°C ilə öz tarixi istilik rekordunu qırıb və eyni vaxtda meşə yanğınları ilə mübarizə aparıb.

Mütəxəssislər xəbərdarlıq edirlər ki, istixana qazı emissiyaları azaldılmadıqca yeni istilik rekordları və iqlim fəlakətləri qaçılmaz olacaq. İstixana qazlarının əsas mənbələri kimi neft, qaz, kömür yandırılması, meşələrin qırılması, sənaye müəssisələri və böyük miqyaslı yanğınlar göstərilir.

Copernicus məlumat verir ki, 2024-cü il müşahidə tarixində ən isti il kimi qeydə alınıb. Avropa isə 1980-ci illərdən bəri qlobal orta göstəricidən iki dəfə daha sürətlə isinir və bu da onu iqlim dəyişikliyindən ən çox təsirlənən qitəyə çevirir.