ABŞ-ın Florida ştatındakı Cape Canaveral Kosmik Qüvvələr Stansiyasından SpaceX şirkətinə məxsus Falcon 9 raketi növbəti kommersiya təchizat missiyasını həyata keçirib.

CRS-33 adlanan bu uçuş çərçivəsində Dragon kapsulu Beynəlxalq Kosmik Stansiyaya avadanlıq və zəruri ləvazimatlar çatdıracaq. Təxminən 28 saat davam edəcək səyahətdən sonra kapsul stansiyaya avtomatik rejimdə birləşəcək.

Bu, Dragon kapsulunun üçüncü, raketin birinci mərhələsinin isə yeddinci uçuşudur. Uğurlu ayrılmadan sonra raketin ilk mərhələsi Atlantik okeanında yerləşən “A Shortfall of Gravitas” adlı dron gəmiyə eniş edib.

SpaceX-in bu missiyası həm texniki təcrübənin artırılması, həm də stansiyanın fasiləsiz fəaliyyətinin təmin edilməsi baxımından xüsusi əhəmiyyət daşıyır.