ABŞ Prezidenti Donald Tramp kabinet iclasında həm daxili siyasət, həm də Rusiya–Ukrayna müharibəsi ilə bağlı sərt açıqlamalar verib.

O, jurnalistlərin hökumətin “siyasallaşdırılması” barədə sualına cavab olaraq, administrasiyasının rəqiblərə qarşı dövlət qurumlarını silah kimi istifadə etmədiyini deyib. Tramp qeyd edib ki, rəsmi sənədlər açıqdır və bu məlumatları araşdırmaq jurnalistlərin vəzifəsidir.

Gündəmdə Rusiya-Ukrayna müharibəsi də olub. Tramp, Rusiyanın Xarici İşlər naziri Sergey Lavrovun Zelenski ilə sülh danışıqlarını rədd etməsinə dair açıqlamaları şərh edərək, “hamının sadəcə mövqe nümayiş etdirdiyini” bildirib. Prezident xüsusi elçisi Stiv Vitkofa da söz verib və o, Trampın fikirlərini dəstəkləyib.

Daxili siyasətə toxunan Tramp, İllinoys qubernatoru Pritskeri və Kaliforniya qubernatoru Nyusomu sərt tənqid edib. Çikaqoda artan cinayətkarlığa və Kaliforniyada təhlükəsizlik problemlərinə diqqət çəkən prezident, yerli rəhbərlərin yardım üçün müraciət etmələri halında federal dəstək göstərməyə hazır olduğunu bildirib.

Tramp kabinet iclasının yekununda administrasiyasının açıq və şəffaf işlədiyini vurğulayıb və indiyədək böyük səhvlərə yol verilmədiyini qeyd edib.