Livanın cənubundakı Raşidiyə düşərgəsi də daxil olmaqla bir neçə fələstinli qaçqın düşərgəsində saxlanılan silahların Livan ordusuna təhvil verilməsi prosesi davam edir.

Fələstin Milli Təhlükəsizlik qüvvələrinin Livandakı rəhbəri Sobhi Abu Arab bəyan edib ki, qərarın məqsədi düşərgələrdəki vəziyyəti sabitləşdirmək, fələstinlilərin mülkiyyət və məşğulluq sahəsində hüquqlarını genişləndirməkdir

“Biz Fətah hərəkatı və Fələstin Azadlıq Təşkilatının fraksiyaları olaraq üzərimizə düşən məsuliyyəti icra edirik. Prezident Mahmud Abbasın Livana səfəri zamanı qəbul edilmiş qərarlara uyğun şəkildə qaçqın düşərgələrindəki vəziyyəti yaxşılaşdırmaq üçün addımlar atılır. Bu qərarlardan biri də ağır silahların Livan ordusuna təhvil verilməsidir.”

BMT-nin Fələstinli Qaçqınlara Yardım Agentliyinin Livandakı direktoru Dorothee Klaus da silahların təhvil verilməsini təhlükəsizlik və sabitlik üçün vacib addım adlandırıb və təşkilatın bu prosesdə dəstəyi davam etdirəcəyini vurğulayıb.

Livan-Fələstin Dialoq Komitəsinin rəhbəri Ramez Dimaşkieh isə prosesin kiçik, lakin mühüm addım olduğunu deyib. O, Livan konstitusiyasına əsasən, ölkədə silahın yalnız dövlətin silahlı qüvvələrində olmalı olduğunu xatırladıb.Dimaşkieh bildirib ki, hökumət qaçqınların əmək və mülkiyyət hüquqlarını genişləndirmək üçün qanun layihəsi üzərində işləyir.


Hazırda Livanda təxminən 200 min fələstinli qaçqın yaşayır. Onlara vətəndaşlıq verilmir, əksər peşələrdə işləmək qadağandır və mülkiyyət hüquqları məhduddur.

silahların təhvili təşəbbüsü gələcəkdə daha mürəkkəb məsələ – Hizbullahın silahsızlaşdırılması müzakirələrinə zəmin yarada bilər.