Rusiyanın Kiyevə qarşı həyata keçirdiyi genişmiqyaslı hava hücumu beynəlxalq ictimaiyyətin kəskin etirazı ilə qarşılanıb. Raket və pilotsuz aparatlarla həyata keçirilən zərbələr nəticəsində azı 21 nəfər həlak olub, 48 nəfər yaralanıb. Hücum zamanı şəhərin mərkəzi hədəfə alınıb, Avropa İttifaqının nümayəndəliyi və Britaniya Şurasının ofisi ciddi ziyan görüb. Yüzdən çox yaşayış binası, uşaq bağçası, ticarət mərkəzi və media ofisləri dağıdılıb.

Ukrayna Prezidenti Volodimir Zelenski hücumu Putinin “sülhə yox, ballistik raketlərə üstünlük verməsi” kimi dəyərləndirib. O bildirib ki, Kreml Ukraynanı və Avropanı hədəfə almaqla qlobal sülh təşəbbüslərinə zərbə endirir.

Ukrayna BMT Təhlükəsizlik Şurasının təcili iclasının çağırılmasını tələb edib.

BMT Baş katibinin sözçüsü Stefan Düjarrik də hücumu qətiyyətlə pisləyərək, mülki infrastruktura zərbələrin beynəlxalq humanitar hüququn açıq-aşkar pozuntusu olduğunu deyib. Onun sözlərinə görə, Kiyevdəki zərbələr nəticəsində bir neçə humanitar təşkilatın ofisləri dağıdılıb, enerji obyektlərinə hücum isə 60 minə yaxın ev təsərrüfatını işıqsız qoyub.


NATO Baş katibi Mark Rütte isə xəbərdarlıq edib ki, Ukraynanın müttəfiqləri “Putin barədə sadəlövh olmamalıdır”. Onun sözlərinə görə, Kreml müharibəni öz xeyrinə çevirmək üçün bütün imkanlardan istifadə edir. Rütte həmçinin Kiyevə təhlükəsizlik zəmanətləri ilə bağlı danışıqların davam etdiyini və yaxın vaxtlarda Zelenski, Putin və ABŞ prezidenti Donald Tramp arasında üçtərəfli görüşün gündəmdə olduğunu açıqlayıb.
Avropa İttifaqı və Böyük Britaniya da sərt diplomatik addımlar atıb. Aİ-nin baş diplomatı Kaja Kallas bildirib ki, diplomatik nümayəndəliklərin hədəfə alınması qəbuledilməzdir və Rusiya səfiri Brüsselə çağırılıb. Avropa Komissiyasının rəhbəri Ursula fon der Lyayen isə hücumun Aİ-nin Ukraynadakı nümayəndəliyinin cəmi 50 metrliyində baş verdiyini, lakin xoşbəxtlikdən əməkdaşların xəsarət almadığını açıqlayıb.

ABŞ administrasiyası Rusiyanın son hava hücumu və Kiyevdə dinc əhaliyə dəyən zərər fonunda həm Moskvanı, həm də Kiyevi tənqid edib. Ağ Evin mətbuat katibi Karoline Leavitt jurnalistlərin suallarını cavablandırarkən bildirib ki, Prezident Donald Tramp hücum xəbərlərini narazılıqla qarşılayıb, lakin “təəccüblənməyib”.

Mətbuat katibi Rusiyanın son raket və pilotsuz aparat hücumlarını pisləyib, eyni zamanda Ukraynanın son həftələr ərzində Rusiyanın enerji infrastrukturuna – xüsusən də neft emalı zavodlarına – endirdiyi zərbələri xatırladıb. Onun sözlərinə görə, avqust ayı ərzində Ukraynanın hücumları Rusiyanın ümumi emal gücünün təxminən 20 faizini sıradan çıxarıb.

Leavitt əlavə edib ki, Tramp yaxın günlərdə məsələ ilə bağlı əlavə açıqlamalar verəcək.

Böyük Britaniyanın mədəniyyət və təhsil sahəsində fəaliyyət göstərən Kiyevdəki Britaniya Səfirliyinin ofisi də ağır ziyan görüb və fəaliyyətini müvəqqəti dayandırıb. Associated Press-in kadrlarında ofisin pəncərələrinin tamamilə sınıb, binanın girişinin dağıldığı görünür. Şuranın rəhbəri Skott Makdonald isə bildirib ki, binanın mühafizəçisi yaralanıb, lakin vəziyyəti stabildir. Bu hadisədən sonra Rusiyanın Londondakı səfiri də Böyük Britaniyanın Xarici İşlər Nazirliyinə çağırılıb.

Kiyevdəki hücum beynəlxalq diplomatiyada gərginliyi artırıb. ABŞ vasitəçiliyi ilə aparılan sülh danışıqları isə Rusiya hücumlarının davam etməsi səbəbindən nəticəsiz qalmaqda davam edir.