İraqın baş naziri Mosulun tarixi Əl-Nuri Böyük Məscidinin və onun əyri minarəsinin rəsmi açılış mərasiminə sədrlik edib. Bu addım, İŞİD tərəfindən məhv edilən şəhərin simvolunun yenidən dirçəlişini göstərir.

Təxminən 850 il boyunca Mosulun mərkəzində ucalan minarə, 2014-cü ildə terror qruplaşması lideri Əbu Bəkr əl-Bağdadinin xütbə oxuyaraq “xilafət” elan etdiyi məkan olmuşdu. Lakin 2017-ci ildə İraq ordusunun əməliyyatları zamanı İŞİD məscidi partladaraq yerlə-yeksan etmişdi.

UNESCO, İraqın dini və irs qurumları ilə birlikdə dağıntılar arasından toplanan materiallardan istifadə edərək məscidi ənənəvi üsullarla yenidən inşa edib. Layihəyə Birləşmiş Ərəb Əmirlikləri və Avropa İttifaqı böyük maliyyə dəstək verib.

Baş nazir Məhəmməd Şia əs-Sudani bildirib ki, bu bərpa prosesi İraq xalqının qəhrəmanlığının, torpaqlarını qorumaq və dağıdılan irsi yenidən dirçəltmək əzminin simvoludur.

Mosulda məscidlərlə yanaşı dağıdılmış kilsələr də bərpa edilib. Rəsmi Bağdad şəhərin müxtəlif icmalarını qucaqladığını və İraqın çoxşaxəli kimliyini əks etdirdiyini vurğulayıb.