Florida ştatı ABŞ-da məktəblərdə vaksin məcburiyyətini aradan qaldıran ilk ştat olacaq. Bu barədə ştatın Səhiyyə Departamentinin rəhbəri, cərrah-general Cozef Ladapo açıqlama verib. Onun sözlərinə görə, bəzi peyvəndlərin məcburi tətbiqi “mənəvi baxımdan yolverilməz” hesab olunur və insan hüquqlarına müdaxilə kimi qiymətləndirilir.

Qərar, qubernator Ron DeSantis və həyat yoldaşı Keysi DeSantisin təşəbbüsü ilə hazırlanmaqda olan geniş “tibbi azadlıq” proqramının bir hissəsidir. Yeni proqram çərçivəsində valideynlərə uşaqlarının peyvənd olunması məsələsində daha çox seçim azadlığı veriləcək.

Lakin səhiyyə mütəxəssisləri və ictimai sağlamlıq qurumları bu addımdan ciddi narahatlıq ifadə edirlər. Onların fikrincə, məktəblərdə vaksin məcburiyyətinin aradan qaldırılması, on illərlə nəzarət altında saxlanılan yoluxucu xəstəliklərin yenidən yayılmasına gətirib çıxara bilər.

Hazırda Floridada məktəbəqədər uşaqların vaksinasiya səviyyəsi 88,7 faiz təşkil edir. Bu göstərici ABŞ üzrə orta göstəricidən – yəni 92 faizdən aşağıdır. Mütəxəssislər xəbərdarlıq edirlər ki, yeni qərar peyvəndləmə səviyyəsini daha da aşağı sala və ictimai sağlamlıq üçün əlavə risk yarada bilər.

Florida rəhbərliyi isə mövqeyini müdafiə edərək bildirir ki, əsas məqsəd insanlara seçim azadlığı vermək və tibbi qərarlara hökumət müdaxiləsini minimuma endirməkdir.