Yəmənin paytaxtı Sənada İsrailin həyata keçirdiyi hava hücumları nəticəsində Milli Muzey və bir sıra tarixi abidələr zədələnib.

Yəmən Mədəniyyət Nazirliyi bildirib ki, minlərlə tarixi artefaktın taleyi hazırda məlum deyil və onlar zərər görmə riski ilə üz-üzədir. Nazirlik UNESCO-ya müraciət edərək hücumların pislənməsini və tarixi irsin qorunması üçün təcili tədbirlərin görülməsini tələb edib.

Husi hərəkatının nəzarətində olan Səhiyyə Nazirliyinin məlumatına görə, hücumlarda ən azı 35 nəfər həyatını itirib, 130-dan çox insan isə yaralanıb. Əksəriyyət qurbanların Sənada olduğu, burada hərbi qərargah və yanacaqdoldurma məntəqəsinin də vurulduğu açıqlanıb.

Al-Məsirə telekanalı isə hava zərbələrinin bir hərbi qərargaha və yaxınlıqdakı yaşayış evlərinə də ziyan vurduğunu bildirib.

İsrail ordusu əvvəllər də husilərin atdığı raket və pilotsuz uçuş aparatlarına cavab olaraq Yəməndə hava əməliyyatları həyata keçirib. İranın dəstəklədiyi husilər öz növbəsində HƏMAS-a dəstək verdiklərini bəyan edərək İsrailə qarşı hücumları davam etdirəcəklərini bildirirlər.