Azərbaycanlı iş adamı, müğənni və bəstəkar, Rusiyanın Crocus Group şirkətinin prezidentinin oğlu Emin Ağalarov ilk dəfə olaraq ABŞ prezidenti Donald Trampla bağlı yaranmış qalmaqaldan danışmalı olub.

Sputnik.az xəbər verir ki, Emin Ağalarov Yurmalada BBC müxbirinin sualları ilə qarşılaşıb.

O, Trampın oğlunun Kremllə əlaqəsi olan vəkillə görüşünü təşkil etməkdə günahlandırılır. İddiaya görə, kiçik Tramp rus vəkil Natalya Veselnitsko ilə görüşüb. Məhz bu görüşdə o, prezidentliyə namizəd olan Donald Tramın əsas rəqibi Hillari Klintona qarşı olan sənədləri milyarderin oğluna verməli idi.

Onun Trampa məhz hansı sənədləri verməyə çalışdığı barədə suala Emin belə cavab verib: "Tramp haqqında heç bir sual verməyin. Mən burada müğənni kimi iştirak edirəm. Bu gün axşam mənim şouma gəlin".

O, hətta Trampla olan e-maillərindən də danışmayıb və bu barədə sualları vəkilinə verməyi məsləhət görüb.

Xatırladaq ki, ABŞ prezidenti Donald Trampın böyük oğlu atasının namizədliyi təsdiq olunduqdan sonra kampaniyaya faydalı məlumat əldə etmək ümidi ilə Hillari Klintona zərər verə biləcək məlumatlar olduğunu iddia edən bir rusiyalı vəkillə görüşdüyünü təsdiq edib.

Görüşdə Ağ Evin hazırkı müşaviri, Donald Trampın kürəkəni Cared Kuşner və Tramp kampaniyasının həmsədri Pol Manafort da iştirak edib. Trampın oğlu onu da əlavə edib ki, atası bu görüşdən xəbərsiz olub. "Reuters"in yaydığı məlumata görə, Trampın oğlu ilə Veselnitskayanın görüşünə müğənni-bəstəkar Emin Ağalarov da vasitəçilik edib.

Tramp ailəsinin Ağalarovlar ailəsi ilə tanışlıq tarixi 2013-cü ildən başlayıb. Həmin vaxt Moskvada "Miss Vselennaya 2013" müsabiqəsi keçirilirmiş. Həmin vaxt Ağalarovların təklifi kiçik Trampı maraqlandırıb. Ata Tramp isə Eminin məşhur kliplərindən birində şirkətin prezidenti obrazını canlandırıb.

Emin Ağalarov Yurmalanın özəl qonağıdır: o, "Layma. Randevü.Yurmala" və "Yeni dalğa" (müsabiqədənkənar proqram) festivallarında iştirak edib.

Bu tədbirlər ənənəvi olaraq Latviyanın kurort şəhərində, özü də təkcə şou-biznes ulduzları deyil, həm də iri sahibkarların iştirakı ilə keçirilir.

Müxtəlif illərdə yerli KİV həmin iş adamları arasında Roman Abramoviç, Əlişir Usmanov, Rinat Əhmədov, Pyotr Avenin də olduğunu bildirib.

Kiçik Donald Tramp da Latviyanı ziyarət edib. 2012-ci ildə o Baltic International Bank-ın baş səhmdarı Valeri Belokonun dəvətilə Riqaya gəlib.

Kiçik Trampın "Otkrıtıy qorod" (Açıq şəhər) jurnalına müsahibəsində deyib ki, Latviyaya ailə biznesi və nəsillərin əlaqələri ilə bağlı danışmaq üçün dəvət edilib.

Amma burada hər hansı konkret biznes müqaviləsi bağlamağa hazırlaşmır, baxmayaraq ki, bu barədə bəzi imkanlar müzakirə edilib.