Ticarətçi: “Maddi yardımın ödənilməsi üçün Rasim Məmmədovun imzası lazımdır, ancaq hələ də mənim sənədimə qol çəkməyib”; Rasim Məmmədov: “Sənədlərində problem yoxdur, yaxın zamanlarda ona dövlət tərəfindən ayrılan vəsait ödəniləcək”

Bu ilin mart ayında yanaraq külə çevrilən “Diqlas” Ticarət Mərkəzinin sahibkarları narazıdırlar. Sahibkarlar “Yeni Müsavat”a müraciət edərək bildiriblər ki, onların problemləri hələ də tam olaraq həll olunmayıb.

“Yeni Müsavat”ın reportyor qrupu olaraq bu və ya digər məsələlərlə bağlı yerində məlumat almaq üçün ticarət mərkəzinin önünə yollandıq. Müşahidə etdik ki, “Diqlas”ın qarşısında hələ də Fövqəladə Hallar Nazirliyinin yanğın söndürən maşını var və nazirliyin əməkdaşları da xidmət aparırlar. Ticarət mərkəzinin ətrafına polis tərəfindən mühafizə barmaqlıqları çəkilib. Ərazidə polis xidmət apararaq, ümumi vəziyyətə nəzarət edir.

Orada olduğumuz zaman ticarət mərkəzində divar saatları satan Fazil Yusibovla həmsöhbət olduq. F. Yusibov bildirdi ki, hələ də dövlət tərəfindən ayrılan maddi yardımı ala bilmədiyi üçün vəziyyətdən narahatdır: “Burada divar saatları satırdım. Yanğın nəticəsində mağazam tamamilə yandı və içərisindəki maldan heç birini çıxara bilmədik. Ərizəmdə də qeyd etdim ki, mənə ümumilikdə 5-10 min manat arasında zərər dəyib. Lakin mənimlə qonşuluqda olan digər mağazaların sahiblərinə yardım edilsə də, bu günə qədər bir manat da olsun maddi yardım ala bilməmişəm. Mənə deyirlər ki, maddi yardımın ödənilməsi üçün ”Diqlas”ın rəhbərlərindən olan Rasim Məmmədovun imzası lazımdır. Ancaq hələ də o, mənim sənədimə qol çəkməyib. Ona görə də pul ala bilmirəm. Vəziyyətim çox ağırdır. Yeganə qazanc yerimiz yanıb və əlimizdə də vəsait yoxdur ki, digər yerdə obyekt götürüb, işə başlayaq. Lap obyekti pulsuz versələr belə, ilkin vəsait lazımdır ki, iş görək. Ancaq pulu ala bilmirəm”.

Məsələ ilə bağlı məlumat almaq üçün Rasim Məmmədovla telefon əlaqəsi saxlamağa cəhd etdik. Telefonu Rasim Məmmədovun işçisi açdı və bildirdi ki, Fazil Yusibovun sənədlərində heç bir problem yoxdur. Yaxın zamanlarda ona dövlət tərəfindən ayrılan vəsait ödəniləcək.

Prezidentin sərəncamı ilə dövlət tərəfindən sahibkarlara verilən vəsaitin miqdarına gəlincə isə qeyd edək ki, mağaza, anbar icarəyə götürmüş zərər çəkmiş sahibkara 10000 manat, piştaxta və digər sahə icarəyə götürmüş zərər çəkmiş sahibkara 2000 manatın verilməsi nəzərdə tutulub.

Contakt.az saytı məlumat yayıb ki, ticarət mərkəzində baş vermiş yanğın nəticəsində mal itkisinə məruz qalan bir qrup sahibkar mayın 1-də Prezident Administrasiyası önündə toplaşıblar.

Sahibkarlar bu toplaşmalarını problemlərinin həll olunmaması ilə izah ediblər: “Bizə dəyən ziyan ödənməyib, təzyiqlər var, istintaq gedir deyə yanan malları qaytarmırlar”, – deyə sahibkarlar bildiriblər.

Onların sözlərinə görə, ilkin yardım kimi nəzərdə tutulan vəsaitlərdən 2 min manat, 10 min manat alan da var, heç almayan da var, hər sahibkara dəyən ziyanın həcmi isə 10 min manatdan 50 min manata qədər və daha yuxarıdır.

Sahibkarlara görə, onlara iş yerləri təklif edənlər var, problem odur ki, mal almağa pulları yoxdur: “Bir tərəfdən pulumuz yox mal alaq, digər tərəfdən istintaq gedir deyə mallarımızı götürə bilmirik. Daha bir tərəfdən yardım kimi götürdüyümüz pullar borc-xərclərimizə gedib. Odur ki, dövlət başçısından xahiş edirik ki, bizə köməklik etsin. İcraçı direktorlar bizim məruz qaldığımız itkini maliyyə vəsaiti olaraq tam göstərməyə qoymurlar. Deyirlər ki, bizim də borc-xərcimiz var”.

Sahibkarlardan bəziləri bildiriblər ki, hətta evlərinə zəruri ərzaq almağa belə pulları yoxdur: “Biz heç nə istəmirik, bizə dəyən ziyanın ödənilməsini istəyirik. Prezident fərman verdi ki, vəsait ödənsin, amma aşağıdakılar ”bizə “baxaq da, bəlkə” kimi cavab verirlər. Odur ki, son ümid olaraq Prezident Administrasiyasının qarşısına toplaşdıq ki, diqqəti problemimizə cəlb edə bilək”. deyə sahibkarlar bildiriblər.

Məlumat üçün onu da qeyd edək ki, martın 26-da “Diqlas” TM-də yanğın baş verdi. Yanğında 400-dən yuxarı sahibkar ziyan çəkdi. Martın 28-də bu məsələ ilə bağlı dövlət başçısı iclas keçirdi. İclasda sahibkarlara dəyən ziyanın ödənməsi, iş yerləri ilə təmin olunmaları ilə bağlı İqtisadiyyat Nazirliyi daxilində komissiya yaradıldı. Bundan əlavə, yanğının səbəblərinin araşdırılması barədə tapşırıq verildi. Martın 29-da sahibkarlara dəyən ziyanın ödənilməsi üçün 3 milyon manat vəsaitin ayırlması barədə sərəncam imzalandı. Xüsusi komissiya isə üç gün ərzində sahibkarları fərdi qaydada qəbul edərək problemlərini dinlədi. Daha sonra isə kompensasiyaların ödənilməsinə başlanıldı.