İş adamı Cavidan Qorçıyev Dövlət Sərhəd Xidməti (DSX) tərəfindən təltif olunub.

Bu gün Sərhəd Qoşunları Günü münasibətilə Xidmətin rəisi, general-polkovnik Elçin Quliyevin əmri ilə ona “Hərbi əməkdaşlıq sahəsində xidmətlərə görə” medalı təqdim edilib.

C.Qorçıyev açıqlamasında bildirib ki, Vətən Müharibəsinin ilk günlərindən könüllü olaraq Azərbaycan Ordusunun sıralarına yazılıb:

"Ermənilərə qarşı döyüşlərdə iştirak etmək istədiyimi ərizədə göstərmişdim. Onda mənə bildirmişdilər ki, hələlik qismən çağırış elan edilib və 3 övladım olduğu üçün hələ arxa cəbhədə öz işini görməliyəm və lazım bilinən vaxt orduya çağırılacam. Həmin ərəfədə qərara gəldim ki, ordunun təminatında iştirak edim və mənə məxsus olan avtomobili təmənnasız Dövlət Sərhəd Xidmətinə hədiyyə etdim. Ondan sonra da bir neçə dəfə Silahlı Qüvvələrə yardım aksiyalarında iştirakı özümə borc bilmişəm".

Qeyd edək ki, C.Qorçıyev ötən ilin oktyabrında Dövlət Sərhəd Xidmətinə şəxsi avtomobilini hədiyyə edib, işlək vəziyyətdə olan "Hummer h3" markalı "pikap"ı təmənnasız olaraq sərhədçilərin ixtiyarına verib.