Xüsusi təyinatlılar Tbilisidə Gürcüstan parlamentinin binası yaxınlığında toplaşan xarici agentlər haqqında qanunun qəbuluna etiraz edənləri dağıtmağa başlayıb. Azadmedia.az xəbər verir ki, məlumat yerli telekanallar tərəfindən yayımlanır.

Bunun üçün təhlükəsizlik qüvvələrinin təzyiqli su və gözyaşardıcı qazdan istifadə etdiyi bildirilir.
KİV-in məlumatına görə, onlar etirazçıları parlament binasının xidməti girişlərindən Rustaveli prospektinin əsas girişinə qədər itələyərək, etirazçıları daha da dağıtmaq üçün mövqe tutublar. Siren səslənir, hüquq-mühafizə orqanlarının əməkdaşları səsucaldandan istifadə edərək etirazçıları dağılışmağa çağırırlar.

Bundan əvvəl məlum olub ki, Gürcüstanda müxalifət ölkə hakimiyyətini xarici agentlərlə bağlı qanun layihəsini geri götürməyə və məhbusları azad etməyə çağırıb.

Xatırladaq ki, martın 7-də Gürcüstan parlamenti səs çoxluğu ilə xaricdən maliyyələşən qeyri-hökumət təşkilatlarının və KİV-lərin reyestrinin yaradılmasını nəzərdə tutan “Xarici təsirin şəffaflığı haqqında” qanun layihəsini birinci oxunuşda qəbul edib. Gürcüstanın paytaxtında qanun layihəsi ilə bağlı mitinqlər ötən həftədən davam edir və bir müddət əvvəl parlament çoxluğunun deputatları müxalifətlə toqquşub.