Avropa İttifaqının beş üzv dövləti — Fransa, İtaliya, İspaniya, Niderland və Litva — Brüsseli Çinin və digər ölkələrin ədalətsiz ticarət praktikasına qarşı daha sərt tədbirlər görməyə çağırıblar.

“Politico” nəşrinin tanış olduğu birgə qeyri-rəsmi sənəddə (“non-paper”) qeyd olunur ki, bu ölkələr Avropa Komissiyasından tariflər və digər müdafiə alətlərindən daha fəal istifadə etməyi tələb edirlər. Sənəd cümə günü həm Avropa Komissiyasına, həm də Aİ-yə üzv ölkələrə göndərilib.
Təşəbbüs Brüsselin Çinlə bağlı daha sərt ticarət müdafiəsi strategiyası hazırladığı dövrə təsadüf edir. Sənəddə Çinin adı birbaşa çəkilməsə də, müəlliflər bəzi əsas ticarət tərəfdaşlarının beynəlxalq qaydaları pozduğunu, yeni maneələr yaratdığını və “sistemli sənaye üzrə artıq istehsalı” təşviq etdiyini bildirirlər.
Sənədi Aİ-nin ən böyük iqtisadiyyatlarının əksəriyyəti dəstəkləyib. Yalnız Almaniya təşəbbüsə qoşulmayıb.
Beş ölkə Avropa Komissiyasından:
bütöv sənaye sahələri üzrə pozuntular zamanı daha tez-tez ticarət araşdırmaları aparmağı;
Ümumdünya Ticarət Təşkilatına daha fəal şikayətlər təqdim etməyi;
ticarət araşdırmaları ilə məşğul olan bölmələrin resurslarını gücləndirməyi tələb edir.
Ən diqqətçəkən təkliflərdən biri isə “iqtisadi təhlükəsizlik” anlayışının ticarət araşdırmalarının başlanması üçün əsas meyarlardan birinə çevrilməsidir. Müəlliflərin fikrincə, bu addım strateji əhəmiyyətli sahələrdə Avropa istehsal güclərinin qorunmasına və sənaye bazasının möhkəmləndirilməsinə kömək edəcək.

Sənəddə həmçinin xarici şirkətlərin Avropa araşdırmalarından yayınmasına imkan verən boşluqların aradan qaldırılması, subsidiya əleyhinə rüsumların birbaşa şirkətlərə tətbiqi və mövcud mexanizmlərin işləmədiyi hallarda istifadə olunacaq yeni “dayanıqlılıq aləti”nin yaradılması təklif olunur.
Bundan əlavə, Avropa istehsalçılarını qorumaq məqsədilə əlavə gömrük rüsumları və tarif kvotalarının tətbiqi də müzakirə edilir.

Emmanuel Macron daha əvvəl bildirmişdi ki, Avropa İttifaqı strateji iqtisadi sahələrin qorunması məsələsində ABŞ nümunəsindən faydalanmalıdır.

Qlobal istehsal balanssızlığı və Çindən gələn ixrac təzyiqi məsələsinin iyunun 15-də Fransanın Evian-le-Ben şəhərində keçiriləcək G7 Summit 2026 toplantısının əsas mövzularından biri olacağı gözlənilir.