Fransada cümə axşamı məktəblilərin etiraz aksiyaları zamanı 504 nəfər saxlanılıb, 48 hüquq-mühafizə orqanı əməkdaşı xəsarət alıb. Bu barədə “Le Figaro” qəzeti ölkənin Daxili İşlər Nazirliyinə istinadən məlumat yayıb.

Nazirliyin məlumatına görə, Fransa üzrə aksiyalarda 71,5 min nəfər iştirak edib. Onlardan 24,5 min nəfəri Parisdə toplaşıb. Təxminən 55 min iştirakçı isə birbaşa təhsil müəssisələrinin qarşısında keçirilən aksiyalara qatılıb.

Daxili İşlər Nazirliyi ümumilikdə ciddi insidentlərin qeydə alınmadığını bildirib. İstisna olaraq, Parisdə Bastiliya meydanında nümayişçilərin dağıdılması zamanı yaranan gərginlik qeyd edilib. Bununla yanaşı, nazirlik məktəblilərin dinc etirazları fonunda şəhərlərdə zorakılıq hallarının artdığını vurğulayıb.

Məlumata əsasən, ötən gecə Puatyedə liseyin ərazisində yanğın baş verib. Alov daha sonra müəllimələrdən birinə məxsus avtomobilə keçib. Sen-Etyendə isə səhər saatlarında bir neçə onlarla şəxs liseyin ərazisinə daxil olaraq yeməkxananı dağıdıb. Bayonnada bir əməkdaşın mənzilinin pəncərələri sındırılıb, müəllimlərə qarşı pirotexniki minaatanlardan atəş açılıb.

Tuluzada aksiyanın yetkin yaşlı iştirakçılarından biri lisey direktoruna zərbə endirib. Sen-Şamonda direktor müavini pirotexniki minaatandan açılan atəş nəticəsində üz nahiyəsindən yanıq xəsarəti alıb.

Bundan başqa, Strasburqda polis avtomobili yandırılıb, La-Roşeldə polis binasına ziyan vurulub, Bordoda isə polis bölməsini yandırmağa cəhd edilib. Qleze şəhərində polis əməkdaşı atılan əşyanın çiyninə dəyməsi nəticəsində yaralanıb. Daha sonra onun başı istiqamətində də pirotexniki minaatandan atəş açılıb.

Daxili İşlər Nazirliyi, həmçinin Lormonda və Loryanda da daxil olmaqla, bir sıra ərazilərdə təhsil müəssisələrinin ərazisinə zorla daxilolma hallarının qeydə alındığını bildirib.

Fransanın daxili işlər naziri zorakılıq hallarını pisləyib və bu cür əməllərin qarşısını alan hüquq-mühafizə orqanlarının əməkdaşlarına təşəkkür edib.