Bakı, 5 Avqust — Azadmedia.az

Bitki Mühafizə və Texniki Bitkilər ETİ-nin Gənc bitki mühafizəçilərinin “Tərəvəz bitkilərinin zərərvericiləri” adlı yeni vəsaiti çapdan çıxıb.

Azadmedia.az xəbər verir ki, 5 avqust 2024- cü il tarixdə BMTB ETİ-nin Gənc alimlərinin yeni elmi vəsaiti işıq üzü görüb.

Bu barədə Bitki mühafizə və Texniki bitkilər Elmi-Tədqiqat İnstitutunun rəhbəri, AMEA-nın müxbir üzvü Prof. İbrahim Cəfərov öz sosial media hesabında bu sözlərə yer verib - “Bu gün çox sevincliyik, Bitki Mühafizə və Texniki Bitkilər ETİ-nin gənc bitki mühafizəçiləri “Tərəvəz bitkilərinin zərərvericiləri” adlı vəsaiti yazdılar və bu gün hazır kitabları nəşriyyatdan götürdük. Çox nəfis nəşr edilib və tərəvəz bitkilərinin demək olar ki, bütün zərərvericilərini əhatə edir. Bəli, gənclərə meydan vermək lazımdır, işləyəndə alınır, sadəcə onları istiqamətləndirmək lazımdır. Bir daha müəlliflər qrupunu təbrik edir, yeni uğurlar arzulayıram.”

Qeyd edək ki, “Tərəvəz bitkilərinin zərərvericiləri” adlı vəsaitdə zərərverici və onlara qarşı aqrotexniki, bioloji və kimyəvi mübarizə tədbirləri barədə ətraflı məlumat verilib. Yeni nəşr Bitki mühafizə və Texniki bitkilər Elmi-Tədqiqat İnstitutunun gənc bitki mühafizəçiləri tərəfindən işlənilib, hazırlanıb. Bu kitab mütəxəssislər, tələbələr, həmçinin tərəvəzçiliklə məşğul olan bütün fermerlər üçün nəzərdə tutulub.