Bakı, 14 avqust — Azadmedia.az


14 avqust, 2024-cü il tarixdə 15 saylı Yasamal rayon birinci seçki dairəsindən deputatlığa namizəd Ülvi Quliyev seçiciləri ilə növbəti genişmiqyaslı görüşünü keçirib.

Azadmedia.az xəbər verir ki, VII çağırış Milli Məclisin deputatlığına namizəd Ülvi Quliyevin seçkiqabağı təbliğat-təşviqat kompaniyası çərçivəsində üçüncü böyük görüşü baş tutub.
Belə ki, görüşdə iştirak edən seçicilər arasında şəhidlərimizin ailə üzvləri və Vətən müharibəsi qazilərimiz də iştirak edib.

Öncə deputatlığa namizəd Ülvi Quliyevin vəkili çıxış edərək namizəd ilə bağlı fikirlərini bölüşüb və hamını sentyabrın 1-də təşkil ediləcək Milli Məclisə növbədənkənar seçkilərdə iştiraka dəvət edib.

Ü. Quliyev görüşdə iştirak edən seçicilərə, ilk növbədə, şəhid ailələrinə və qazilərə söylədikləri səmimi fikirlərə, verdikləri dəstəyə görə səmimi qəlbdən təşəkkürünü bildirib. Daha sonra Ü.Quliyev sonuncu Milli Məclis seçkilərindən sonra deputat fəaliyyəti barədə məlumat verərək gördüyü işlər barədə hesabatı sakinlər ilə bölüşüb. Eyni zamanda, Prezident İlham Əliyevin bütün sahələr üzrə uğurlu siyasətindən danışıb və dövlət siyasətini hər daim dəstəklədiyini vurğulayıb. Həmçinin qeyd edib ki, ölkə rəhbərinin müəyyənləşdirdiyi strategiyaya uyğun olaraq şəhid ailələri və qazilərə diqqət, fəaliyyəti müddətində əsas istiqamətlərdən olub və bundan sonra da bu belə olacaqdır.

Görüşdə çıxış edən şəhid ailələri Ü.Quliyevə deputatlıq dönəmində ayırdığı diqqət və qayğıya görə minnətdarlıqlarını bildiriblər.

Qeyd edək ki, görüş zamanı seçiciləri düşündürən məsələlər və suallara aydınlıq gətirilib. Ü. Quliyev bu görüşlərin davamlı olacağını diqqətə çatdırıb.