Ermənistanda azərbaycanlı hərbçi Hüseyn Axundov 20 il müddətinə azadlıqdan məhrum edilib.

O, eyni vaxtda bir neçə maddə ilə - guya Zəngəzur mis-molibden zavodunun 57 yaşlı mühafizəçisini qətlə yetirməkdə, habelə dövlət sərhədini qanunsuz keçməkdə, odlu silah və sursatların dövlət sərhədindən qanunsuz keçirilməsində ittiham olunub.

Xatırladaq ki, aprelin 10-da Azərbaycan Müdafiə Nazirliyi iki Azərbaycan hərbçisi Hüseyn Axundov və Aqşin Bəbirovun Naxçıvan Muxtar Respublikasının Şahbuz rayonu ərazisində Ermənistanla sərhəddə əlverişsiz hava şəraiti nəticəsində görmə qabiliyyətinin məhdudlaşdırılması səbəbindən itkin düşməsi barədə məlumat yayıb. Həmin gün Ermənistan Müdafiə Nazirliyi öz ərazisində itkin düşmüş azərbaycanlı hərbçilərdən birinin saxlanıldığını açıqlayıb. Aprelin 13-də isə ikincinin saxlanması haqqında. Eyni zamanda Ermənistan tərəfi həbsdə olan azərbaycanlı hərbçi Hüseyn Axundovun vəhşicəsinə döyülməsinin videosunu yayıb. Görüntülərdə qanlar içində əlləri arxadan bağlanmış hərbçinin təpikləndiyi halda yerdə necə uzanması əks olunub.

Daha sonra Ermənistanda məhkəmə həbsdə olan azərbaycanlı hərbçilərdən biri Aqşin Bəbirovu 11,5 il müddətinə azadlıqdan məhrum edib.

Rəsmi Bakı dəfələrlə Ermənistan tərəfindən Azərbaycan və Ermənistanın İkinci Qarabağ müharibəsindən sonra razılığa gəldiyini xatırladaraq, itirilmiş Azərbaycan hərbçilərinin dərhal geri qaytarılmasını tələb edib. Tərəflər xoşməramlılıq əlaməti olaraq hərbçilərin itdiyi təqdirdə onları iki gün ərzində geri qaytarmağı öhdəsinə götürüb. Lakin Azərbaycan hakimiyyətinin fikrincə, Ermənistan tərəfi razılaşmaları pozur.