44 günlük Vətən müharibəsində işğaldan azad olunan Zəngilan rayonu bu gün Azərbaycanın ən dinamik inkişaf edən bölgələrindən birinə çevrilir. Prezident İlham Əliyevin rəhbərliyi ilə həyata keçirilən genişmiqyaslı bərpa-quruculuq işləri nəticəsində Zəngilan qısa müddətdə müasir infrastruktur, yaşayış məntəqələri və iqtisadi potensial baxımından yeni simaya qovuşur.

Zəngilan Azərbaycanın “ağıllı şəhər” və “ağıllı kənd” layihələrinin həyata keçirildiyi ilk rayonlardan biridir. Ağalı kəndində qurulan “Ağıllı kənd” kompleksi artıq uğurla fəaliyyət göstərir. Burada müasir məktəb, tibb məntəqəsi, uşaq bağçası, inzibati bina, istixanalar və alternativ enerji mənbələri ilə təmin olunan yaşayış evləri sakinlərin istifadəsinə verilib.

Bu layihə Zəngilanda aparılan quruculuq prosesinin əsas istiqamətlərindən birinə çevrilərək gələcəkdə digər kənd və qəsəbələr üçün də nümunə rolunu oynayır.

Hazırda rayonda avtomobil yollarının, körpülərin, elektrik və qaz xətlərinin, içməli su və kanalizasiya sistemlərinin yenidən qurulması istiqamətində geniş işlər görülür. Zəngilan Beynəlxalq Hava Limanı artıq istismara verilib və bu, bölgənin iqtisadi və turizm potensialının artmasına mühüm töhfə verir.

Zəngilanı ölkənin digər bölgələri ilə birləşdirən əsas yollar — Horadiz-Zəngilan-Ağbənd avtomobil magistralı, həmçinin dəmir yolu xətləri sürətlə tikilir. Bu layihələr həm əhalinin rahat gediş-gəlişini təmin edir, həm də regionda iqtisadi əlaqələri gücləndirir.

Zəngilan “yaşıl enerji zonası” kimi formalaşır. Günəş və su elektrik stansiyalarının qurulması, alternativ enerji mənbələrindən istifadə sahəsində həyata keçirilən layihələr bölgənin ekoloji təmiz, davamlı inkişafına zəmin yaradır.

Prezident İlham Əliyev və birinci xanım Mehriban Əliyevanın Zəngilana mütəmadi səfərləri də burada aparılan işlərin sürətinə və miqyasına diqqətin göstəricisidir.

Artıq ilk mərhələdə bir neçə yüz ailə Zəngilana qayıdıb. Yeni inşa edilən yaşayış binaları, məktəblər, sosial obyektlər, sağlamlıq və mədəniyyət mərkəzləri sakinlərin rahat yaşayışı üçün bütün şəraiti təmin edir.

Qayıdış prosesi mərhələli şəkildə davam edir və yaxın illərdə Zəngilanın bütün kəndlərində həyat tam bərpa olunacaq.

Zəngilan bu gün təkcə işğaldan azad olunmuş bir rayon deyil, həm də yenidən dirçələn, müasir və perspektivli bölgədir. Burada görülən bərpa-quruculuq işləri Azərbaycanın gücünü, xalqımızın əzmini və dövlətimizin iradəsini əks etdirir.





Səfalı Paşayev, YAP Masallı rayon təşkilatının sədr müavini