Bu gün Aillə, Qadın, Uşaq Problemləri üzrə Dövlət Komitəsinin Qəbələ Uşaq və Ailələrə Dəstək Mərkəzində “Azərbaycan Valideyn-Müəllim Assosiasiyası” İctimai Birliyinin həyata keçirdiyi “Üçbucaq” - “milli tərbiyə modeli”nin formalaşdırılmasında ailə dəyərlərinin və valideyn-müəllim-uşaq əməkdaşlığının rolu adlı layihəsinin ilk tədbiri həyata keçirilib.

Birlikdən verilən məlumata görə, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir. Müxtəlif ailə nümayəndələrinin, valideynlərin iştirak etdiyi tədbirdə giriş sözü ilə çıxış edən Qəbələ Uşaq və Ailələrə Dəstək Mərkəzinin rəhbəri Günel Ağayeva qonaqları salamlayaraq, təqdim olunan mövzunun dövrümüz üçün ən aktual problemlərdən biri olduğunu qeyd edib.

Layihənin rəhbəri, AVMA İB icraçı direktoru Şahin Rəcəbov layihə barədə iştirakçılara geniş məlumat verərək, milli tərbiyə modelinin qurulması, mövcud durum, bu sahədə beynəlxalq təcrübə və ölkə qanunvericiliyi barədə geniş çıxış edib. O, valideynlərin suallarını da cavablandırıb: “Əvvəllər yaşlı nəsildən milli mənəvi dəyərlər, adət-ənənələr gənc nəsilə ötürülür və ailələrin dayanıqlığı təmin olunurdu. Lakin indi müasir gənc ailələrdə gənc valideynlər uşaqları necə tərbiyə etmək lazım olduğunu bilmirlər, bunun üçün bir ortaq tərbiyə nümunəsi, modeli qurulmayıb, tərbiyə haqqında Qanun yoxdur. Təlim-tədrisdə təlimə üstünlük verilir, tərbiyə arxa planda qalır. Bu istiqamətdə ciddi tədqiqatlara, dövlət proqramına, qanunvericilik təşəbbüslərinə ehtiyac vardır”.

Mövzu ətrafında ailə nümayəndələrinin geniş fikir mübadiləsi aparılıb. İştirakçılar bu gün ailədə, cəmiyyətdə, sosial mediada, xüsusən də məktəblərdə baş verənlərlə bağlı problemlərin əksəriyyətinin ailədən qaynaqlandığını və bunun birbaşa tərbiyə məsələləri ilə bağlı olduğunu vurğuladılar. İştirakçılar milli tərbiyə modelinin qurulması, valideynlərin-müəllimlərin-uşaqların bu mövzuda əməkdaşlığına dair öz təkliflərini, təcrübələrini bölüşüblər.

Layihənin məqsədi ölkəmizdə “milli tərbiyə modelininin” formalaşdırılması istiqamətində təşəbbüs irəli sürmək, bunun üçün ailə dəyərlərinin təbliği və valideyn- müəllim- uşaq əməkdaşlığının rolunun artırılmasına dair valideynlərlə maarifləndirməni həyata keçirmək, bu sahədə əməkdaşlığı və məsuliyyəti artırmaqdır.

Layihə çərçivəsində 4 ay müddətində 9 rayonda - Mingəçevir, Qəbələ, İsmayıllı, Neftçala, Masallı, Lerik, Lənkəran, Astara, Quba rayonlarını əhatə etməklə “milli tərbiyə modeli”ni formalaşdırılması üçün ailə dəyərlərinin və valideyn-müəllim-uşaq əməkdaşlığının rolunu artırmaq mövzusunda yerli sakinlərlə, valideynlərlə maarifləndirmə görüşlərinin təşkili, görüşlərdən çəkilən materiallarından ibarət video roliklərin hazırlanması və sosial şəbəkələrdə (youtube və facebook) yayılması nəzərdə tutulur.

Qeyd edək ki, layihə üzrə növbəti tədbir Lerik rayonunda həyata keçiriləcəkdir.