Bələdiyyə Resurs və Təlim Mərkəzi İctimai Birliyi tərəfindən icra olunan "Məsuliyyətli valideyn ailə dəyərinin təməlidir adlı tədbirlərin təşkili" layihəsinin icrası davam edir.

Birlikdən verilən məlumata görə, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən layihənin icra planına uyğun valideynlər arasında maariflənmə işləri davam etdirilir. Oktyabrın 12-də Samux rayonu Çobanabdallı kəndində (Çobanabdallı kənd tam orta məktəbdə) daha 25 valideyinə "Valideyn məsuliyyətliyi" mövzusunda təlim keçirilib. Təlim zamanı valideyn vəzifələri və məsuliyyəti, valideyn- övlad münasibətində anlaşılmazlıq, konfliktlər və onların həlli yolları, həmçinin, məsuliyyətsizlik və digər səbəblərdən Qanunvericiliklə tənzimlənən valideynlik hüquqlarından məhrum edilmə kimi məsələlərə toxunulub və valideyn- övlad arasında sağlam münasibətə təsir edən amillərdən söhbət aparılıb. Təlim boyu müxtəlif rol oyunları, energizerlər və qrup işləri təşkil olunub.

Qeyd edək ki, mövzu ətrafında geniş müzakirələr aparılıb, təlim valideynlər tərəfindən maraqla qarşılanıb.