“Yeni Fikir” JHİB Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Vətəndaş Həmrəyliyinin Gücləndirilməsi” layihəsi çərçivəsində Qax Peşə Liseyinin tələbələrinin iştirakı ilə maarifləndirici tədbir keçirildi. Tədbirdə 44 günlük Vətən müharibəsində Azərbaycan xalqının həmrəyliyindən bəhs edildi.

QHT.az xəbər verir ki, bu barədə məlumatı “Yeni Fikir” JHİB-in sədri, layihə rəhbəri Elmira Mehdiyeva verib. Onun sözlərinə görə, Postmüharibə zamanında qalib Azərbaycan cəmiyyətinin daha çox maariflənməsinə, yeni bilgilər, informasiyalarla təmin olunmasına böyük ehtiyac var: "Bu məqsədlə Vətən müharibəsindən, Azərbaycanın qələbəsindən, zəfərindən sonra yeniyetmə və gənclərimiz arasında Vətən müharibəsi qələbəsini təbliğ etməliyik. Gənc nəsil 2020-ci ildə 44 günlük müharibədə təkcə qələbəmizdən deyil, hakimiyyət-ordu-xalq birliyi və vəhdətindən də bilgilənməlidir. Dövlətimizin, xalqımızın, ordumuzun yenilməzliyi, cəsurluğu ilə fəxr etməlidir".

Layihənin eksperti İbrahim İbrahimov bildirib ki, bu döyüşlər zamanı xalqımız heç vaxt olmadığı kimi birlik və həmrəylik nümayiş etdirdi: "Bu elə bir həmrəylik idi ki, onun gücü bizi çox güclü havadarları olan və bütün dünya tərəfindən dəstəklənən mənfur bir düşmən üzərində qələbəyə apardı. Biz qələbə çaldıq və bu qələbənin dərslərini indi bütün dünya araşdırır. Bunun səbəbi xalqımızın, ordumuzun və ən əsası da Ali Baş Komandanımızın sonsuz vətən sevgisi, itirilmiş torpaqlarımızın qaytarılması üçün olan əzmi və bu torpaqlarda yaşayan hər bir millətin nümayəndəsinin Azərbaycanı öz vətəni bilərək həmrəy olması idi. Bunların hər biri milli dəyərlərimizdir və onları böyüyən nəsilə çatdırmaq bizim borcumuzdur. Bu qələbəni bizə yaşadan şəhidlərimizə hər zaman borcluyuq və onların əziz xatirəsini bir dəqiqəlik sükutla yad edək".

Ekspert daha sonra bildirib ki, Qax Peşə Liseyinin məzunlarının qəhrəmanlığını xüsusi qeyd etmək lazımdır: "Birinci Qarabağ savaşında bu liseyin 92 məzunu şəhid olub. "2020-ci il Vətən müharibəsində isə Qaxın 34 şəhidindən 8-i məhz bu liseyin məzunu olub. Bir təhsil müəssisəsinin 100 şəhidi olması həqiqətən bir qəhrəmanlıq yoludur və bu gün burada təhsil alan gənclər bu şərəfli tarixi unutmamalıdırlar".

Tədbir iştirakçılarından Əzəddin Nəsibov, Səidə Muradlı və Beka Paşxataşvili qeyd ediblər ki, 44 günlük Vətən müharibəsi xalqımızın şərəf tarixidir. 200 ildən bəri torpaqları zaman-zaman qəsb edilən xalqımız öz dədə-baba torpaqlarından qaçqın və didərgin düşüblər. Lakin son qələbə o qədər möhtəşəm idi ki, o əzablı günləri unutdurdu. İndi Qarabağın işğaldan azad olunmuş torpaqlarında həyat canlanıb, ən müasir yaşayış məntəqələri inşa olunur. Bu geniş quruculuq işində də xalqımız həmrəylik nümayiş etdirir.

Gənc iştirakçılar vətənə, dövlətə və şəhidlərimizə layiq vətəndaş olmağa səy göstərdiklərini dönə-dönə vurğulayıblar. Qeyd ediblər ki, güc birlikdədir və bu həmrəyliyimizi pozmağa çalışan xarici düşmənlərə heç vaxt belə bir fürsət verilməyəcək.

Dəyirmi masanın fəxri qonağı şairə Solmaz Əfəndiyeva gəncləri vətəni sevməyə, şəhidlərin ruhunu hörmətlə yad etməyə, Vətən müharibəsinin dərslərini öyrənməyə və fəal vətəndaş olmağa səsləyib. Qax rayonu Gənclərin İnkişaf və Karyera Mərkəzinin rəhbəri Elmir Həşimli də gəncləri karyera mərkəzi ilə sıx əməkdaşlığa çağırıb. O, karyera mərkəzinin gənclərə daha yaradıcı və təşəbbüskar olmağı öyrətdiyini, kreativ düşüncənin gələcək uğurlara apardığını bildirib. Könüllülük hərəkatının gənclərin inkişafında böyük əhəmiyyət kəsb etdiyini vurğulayıb.

Çay süfrəsi arxasında gedən səmimi söhbət zamanı yeniyetmə gəncləri maraqlandıran suallar layihə rəhbəri və ekspert tərəfindən cavablandırılıb.