Rusiya Xarici İşlər Naziri Sergey Lavrov bazar günü verdiyi müsahibədə bildirdi ki, Ukraynanın təhlükəsizliyinin təmin olunması üçün bir sıra ölkələr, o cümlədən BMT Təhlükəsizlik Şurasının daimi üzvləri qarant rolunu oynamalıdır.

Lavrov NBC News-ə açıqlamasında qeyd edib ki, Rusiya Prezidenti Vladimir Putin və ABŞ Prezidenti Donald Trump Ukraynanın təhlükəsizlik zəmanətləri məsələsini müzakirə ediblər. O xatırladıb ki, 2022-ci ildə İstanbul danışıqları uğursuz nəticələnib. Həmin vaxt Rusiya və Ukrayna, Ukraynanın daimi neytrallığı müqabilində Təhlükəsizlik Şurasının beş daimi üzvü – Britaniya, Çin, Fransa, Rusiya və ABŞ – və digər ölkələrdən təhlükəsizlik zəmanətləri alması barədə razılaşmışdılar.

Lavrov bildirib ki, qarant qrupuna Almaniya, Türkiyə və digər ölkələr də daxil ola bilər. Onun sözlərinə görə, Ukraynanın neytral, hər hansı hərbi blokla əlaqəsiz və nüvə silahından uzaq olması təmin edilməlidir.

Rusiya naziri həmçinin Ukraynanın NATO-ya üzvlüyünü qəbul etmədiklərini, rusdilli əhalinin qorunmasını və Ukrayna ilə ərazi müzakirələrinin vacibliyini vurğulayıb.