Monteneqro gələn həftədən etibarən xarici turistlərə sərhədləri açmağı planlaşdırır.

Bu barədə ölkənin baş naziri Zdravko Krivokapiç Yunanıstana səfərinin sonunda açıqlama verib.

"Bu gün Yunanıstanda əhəmiyyətli bir gündür - bu gündən etibarən ölkə bütün turistlər üçün açılıb. Protokollarımız oxşardır, yanaşmalar təqribən bənzəyir və Monteneqro gələn həftə ən vacib sözlərlə turistlər üçün bütün sərhədləri açacaq: "Çernoqoriya sahillərinə xoş gəldiniz!"",-deyə Krivokapiç hökumətin mətbuat xidməti tərəfindən yayımlanan videomüraciətdə bildirib.

Qeyd edək ki, Monteneqro Avropada epidemioloji vəziyyətin ən pis olduğu ölkələrdən biri olaraq qalmaqdadır. Ümumilikdə 600.000 əhalisi olan ölkədə koronavirusdan 1 556 nəfər həlak olub. Mart ayının əvvəlində Monteneqro hökuməti koronavirusun yayılması fonunda səhiyyə sistemindəki ağır vəziyyətlə əlaqədar olaraq NATO və Avropa Birliyinə yardım üçün müraciət edib.