Kriminal avtoritet Ara Vardanyanın (Ermənistanda “Çvçv Aro” kimi tanınır) oğlu Serj Vardanyan həbs edilib.

Bu barədə Ermənistan İstintaq Komitəsinin mətbuat xidməti məlumat yayıb.

İstintaqın məlumatına görə, 2024-cü il yanvarın 24-də İrəvanın Kanaker-Zeytun inzibati rayonu ərazisində “Mercedes” markalı avtomobilin sürücüsünün sürət həddini aşması, işıqforun qırmızı işığından keçməsi və qarşıdan gələn yolda hərəkət etməsi barədə məlumat daxil olub.

Saat 02:00 radələrində patrul əməkdaşları avtomobili görüb və onu saxlamağa cəhd ediblər. Sürücü hüquq-mühafizə orqanlarının əməkdaşlarının əmrinə tabe olmayıb.

Üstəlik, təqib zamanı o, polisə hücum edib, daha sonra avtomobili yolun kənarına qoyub və qaçmağa cəhd edib. Lakin o, saxlanılıb.

Həbs zamanı Serj Vardanyan polislərdən birini vurub.

Məlum olub ki, onun sürücülük vəsiqəsi yoxdur və həbs edildikdən sonra Vardanyan ayıqlıq imtahanından imtina edib.

Axtarış zamanı polis 0,0026 qram buprenorfin də aşkar edib.

O, Ermənistan Cinayət Məcəlləsinin bir sıra maddələri (polis əməkdaşlarının fəaliyyətinə mane olma, onlara qarşı zor tətbiq etmə, əmlaka zərər vurma, avtoxuliqanlıq, lisenziyasız avtomobil idarə etmə, qanunsuz olaraq narkotik vasitələri əldə etmə) ilə ittiham olunub.

Məhkəmə onun həbsi ilə bağlı vəsatəti təmin edib.

Qeyd edək ki, bu, Serj Vardanyanın belə hərəkətlərinə görə ilk həbsi deyil.