ABŞ Ticarət Departamenti Intel və Qualcomm şirkətlərinə yarımkeçiricilər Huawei-yə ixrac etməyə icazə verən lisenziyaları ləğv etmək qərarına gəlib. Bu addım ABŞ-ın Çin texnologiya nəhənginə qarşı davam edən siyasətinin bir hissəsidir. Bu barədə Financial Times (FT) məlumat yayıb.

Financial Times xəbər verir ki, lisenziyaların geri götürülməsi Huawei-nin noutbuk, smartfon və digər elektronika istehsalında istifadə etdiyi çiplərin tədarükünə təsir edəcək. Bu, şirkəti ABŞ-ın qabaqcıl yarımkeçirici texnologiyalarına girişdən məhrum etməklə Huawei-nin biznesinə ciddi ziyan vura bilər.

Əvvəllər Huawei, mövcud məhdudiyyətlərə baxmayaraq, öz flaqman çipində Mate 60 Pro smartfonunu buraxaraq dünyanı heyran etməyi bacarmışdı. Bu, amerikalı qanunvericilərin hazırkı sanksiyalar tədbirlərinin effektivliyini şübhə altına almağa və onların sərtləşdirilməsinə çağırmağa vadar edib.

Məsələn, ABŞ Konqresindəki senator Marko Rubio və konqresmen Elise Stefanik kimi respublikaçılar, Huawei-nin noutbuklarında Intel-in ən qabaqcıl çiplərindən istifadə etdiyinə dair xəbərlərdən sonra Bayden administrasiyasına Intel və Qualcomm üçün ixrac lisenziyalarını ləğv etmək üçün təzyiq göstərdilər.

Ekspertlər hesab edirlər ki, bu qərar Vaşinqtonun ABŞ-ın milli təhlükəsizliyinə təhdid kimi qiymətləndirilən Çin texnologiya şirkətləri ilə qarşıdurmada qətiyyətini nümayiş etdirir. Eyni zamanda, qərar yarımkeçirici texnologiyalarının ixracına məhdudiyyətlərin sərtləşdirilməsindən qorxan ABŞ-ın müttəfiqləri arasında təşviş yaradıb.

Qeyd olunur ki, Huawei-yə tədarükün dayandırılması çətin ki, Qualcomm və Intel-in biznesinə ciddi təsir göstərsin. Qualcomm bu yaxınlarda bildirdi ki, Huawei-yə tədarük məhduddur və tezliklə quruyacaq, çünki Çin şirkətinə 5G-ni dəstəkləyən çipləri satmaq çoxdan qadağan edilib. Intel-ə gəlincə, Huawei də onun ən böyük müştəriləri siyahısında deyil.