Azərbaycan tarixində elə şəxsiyyətlər var ki, onların adı yalnız bir dövrün deyil, bütöv bir epoxanın yaddaşı olur. Ümummilli Lider Heydər Əliyev belə şəxsiyyətlərdəndir. O, müstəqil dövlətçiliyimizin memarı, milli ideologiyanın banisi, xalqın taleyini dəyişən fenomenal liderdir. Onun fəaliyyəti Azərbaycanı Xəzərin sahilində sıravi bir respublikadan regionun ən güclü dövlətlərindən birinə çevirən strateji dövlətçilik məktəbinin qurulması ilə əbədiləşib.

Heydər Əliyev Azərbaycan xalqının yaddaşında ilk növbədə xilaskar lider kimi qalıb. 1990-cı illərin əvvəllərində ölkənin siyasi xaosa, separatizmə və iqtisadi tənəzzülə sürükləndiyi bir zamanda xalqın təkidli tələbi ilə yenidən hakimiyyətə qayıtması Azərbaycanın müstəqilliyini real məzmuna çevirdi. O, yalnız dövlətçiliyi qorumaqla kifayətlənmədi, həm də modern və dayanıqlı inkişaf modelinin əsasını qoydu.

Ulu Öndərin hakimiyyəti dövründə qurulan siyasi konsepsiya bu gün də dövlət idarəçiliyinin təməl sütunlarını təşkil edir:
Güclü dövlət – müasir Azərbaycan dövlətçiliyinin baş prinsipi, realist və çevik xarici siyasət, Azərbaycanın regionda balanslaşdırıcı rolunu müəyyənləşdirən strateji xətt, iqtisadi islahatlar, müasir enerji strategiyasının və davamlı inkişaf modelinin bünövrəsi, sosial rifah dövlətinin qurulması və əhalinin geniş təbəqələrinin sosial müdafiəsini təmin edən sistem.

Heydər Əliyevin neft strategiyası bu gün Azərbaycan iqtisadiyyatının ürəyi kimi fəaliyyət göstərən Bakı–Tbilisi–Ceyhan, Bakı–Tbilisi–Ərzurum, TANAP kimi qlobal layihələrin toxumu idi.

Ümummilli Liderin ən böyük miraslarından biri də milli ideoloji konsepsiyanın - Azərbaycançılığın formalaşdırılmasıdır. Bu ideologiya dili, dini, siyasi düşüncəsi fərqli bütün azərbaycanlıları bir amal uğrunda birləşdirən güclü mənəvi kod kimi çıxış edir. Bu gün dövlət siyasətinin hər bir istiqamətində məhz bu ideologiyanın gücü hiss olunur.

Heydər Əliyevin yaratdığı dövlətçilik modeli bu gün Prezident İlham Əliyev tərəfindən yeni reallıqlara uyğun formalaşan inkişaf mərhələsinə yüksəldilib. 2020-ci ildə əldə olunan tarixi Zəfər, beynəlxalq güc mərkəzlərində Azərbaycanın rolunun yüksəlməsi, güclü ordu, müasir iqtisadiyyat və qlobal təşəbbüslər Ümummilli Liderin uzaqgörən siyasətinin məntiqi davamıdır.

Heydər Əliyev yaddaşımızda əbədiyaşar liderdir.
Onun siyasi irsi yalnız keçmişin qüruru deyil, həm də bu günün inkişaf xəritəsi və gələcəyin yol göstəricisidir. Heydər Əliyev haqqında deyilən ən böyük həqiqət budur: O, Azərbaycanı zamanın sərt sınaqlarından çıxaran, ona güc, iradə və sabitlik gətirən lider idi.

Bu gün Ulu Öndərin xatirəsini anmaq təkcə hörmət deyil, həm də onun ideyalarına sədaqətin, müstəqil dövlətimizin gələcəyinə inamın ifadəsidir.

Heydər Əliyev bu xalqın taleyinə yazılmış ən böyük dövlətçilik zirvəsidir.

Ulu öndər Heydər Əliyev müstəqil Azərbaycanın inkişaf yolunun təməlinin banisidir. Ulu öndəri hər zaman ehtiramla anırıq.

Məşhur Məmmədov,
Milli Məclisin deputatı