Gürcüstanın xarici işlər nazirinin müavini Laşa Darsalia Türkiyədə Diplomatik Forumda olarkən bildirib ki, Gürcüstan hakimiyyəti Azərbaycan və Ermənistan rəhbərliyini Tbilisidə sülh sazişi və Ermənistan-Azərbaycan nizamlanmasının digər aspektləri üzrə danışıqlara dəvət edir.

Darsaliya izah edib ki, Gürcüstan Cənubi Qafqazda sabitliyin yaradılmasına sadiqdir və Azərbaycan və Ermənistan arasında sülh müqaviləsinin sazişin bütün tərəflərinə və onların qonşularına fayda verəcəyini gözləyir.

Diplomat qeyd edib ki, Gürcüstan həm Azərbaycana, həm də Ermənistana güvənir və qarşılıqlı məqbul sülhün əldə olunmasında onlara öz köməyini təklif edir. Eyni zamanda o, Ermənistan-Azərbaycan dialoqunda regiondankənar dövlətlərin iştirakına qarşı çıxış edib.

“Bizə aydındır ki, kənar oyunçuları arenamıza buraxmaq əvəzinə, regionda əməkdaşlığı dəstəkləməliyik” - Lasha Darsalia bildirib.

Bundan əlavə, gürcü rəsmisi “Orta Dəhliz” layihəsinin inkişafını və Gürcüstanın bu layihədə iştirakının genişlənməsini alqışlayıb. Azadmedia.az bildirir ki, bu barədə Sputnik-Georgia yazır.