İsrail və bir sıra ərəb ölkələri "Flydubai" aviaşirkətinə məxsus təyyarə ilə bağlı insidenti əvvəlcədən planlaşdırıb. Bu barədə İranın Press TV telekanalı bölgədəki məlumatlı mənbəyə istinadən məlumat yayıb.

Telekanalın iddiasına görə, insidentdən məqsəd ABŞ-ı Tehranla qarşıdurmanın yeni mərhələsinə cəlb etmək və İsrailin Baş naziri Benyamin Netanyahunun qarşıdakı seçkilərdə mövqelərini gücləndirməsinə şərait yaratmaq olub.

Press TV-nin mənbəsi bildirib ki, təyyarənin ələ keçirilməsi ilə bağlı “absurd ssenari” Netanyahunun Birləşmiş Ərəb Əmirliklərinə səfərindən üç gün sonra həyata keçirilib. İddia olunur ki, İsrail liderinin səfəri zamanı bu plan müzakirə edilərək yekunlaşdırılıb.

Mənbənin sözlərinə görə, səfər çərçivəsində BƏƏ-yə İsrailin regional layihələrində müəyyən rol ayrılıb. Həmçinin İsrailin digər ərəb ölkələrinin rəsmiləri ilə çoxsaylı danışıqlar apardığı və İranı ittiham etmək məqsədilə “başqasının adı ilə həyata keçirilən əməliyyat” planının hazırlandığı iddia edilir.

Press TV-nin məlumatına əsasən, əməliyyatın əsas məqsədi ABŞ prezidenti Donald Trampı yeni qarşıdurmaya cəlb etmək və İranla müharibənin növbəti mərhələsini başlatmaq olub.

Mənbə həmçinin bildirib ki, Netanyahu hökumət koalisiyasının parlament seçkilərində çoxluğu əldə edə bilməyəcəyindən ehtiyat edir və ABŞ-ın İranla qarşıdurmaya cəlb edilməsinin daxili siyasi vəziyyətini yaxşılaşdıracağına ümid edir.

İran tərəfinin ABŞ və İsrailin fəaliyyətini diqqətlə izlədiyi və mümkün yeni addımlara hazırlaşdığı da iddia olunur. Mənbə xəbərdarlıq edib ki, İran ABŞ və İsrail tərəfindən hər hansı düşmənçilik addımı atılacağı təqdirdə cavab zərbəsi endirməyə hazırdır.

Qeyd edək ki, Press TV-nin yaydığı bu məlumatlar telekanalın istinad etdiyi anonim mənbənin iddialarına əsaslanır və xəbərdə onların müstəqil şəkildə təsdiqləndiyi bildirilməyib.