Britaniyalı fermer İan Paton dünyanın ən ağır balqabağını yetişdirərək özünə məxsus dünya rekordunu yeniləyib. Təxminən 1 296 kiloqram ağırlığında olan nəhəng balqabaq rəsmi olaraq rekord kimi qeydə alınıb. Bu barədə UPI məlumat yayıb.

Hempşir qraflığının Liminqton şəhərindən olan 65 yaşlı Paton “Bagira” adını verdiyi balqabağı Berkşir qraflığında keçirilən “Wargrave Nursery Giant Pumpkin Weigh-off” adlı nəhəng balqabaqların çəkilməsi yarışmasına gətirib. Oktyabrın 3-də balqabağın çəkisi Ginnesin Rekordlar Kitabının nümayəndəsinin nəzarəti altında müəyyənləşdirilib.

Beləliklə, fermer ötən il qardaşı Stüartla birlikdə müəyyən etdiyi rekordu yeniləyib. 2025-ci ildə onların “Maqql” adlandırdıqları balqabağın çəkisi 2 819,25 funt, yəni təxminən 1 279 kiloqram olub.

Yeni rekordçu balqabağın yetişdirilməsi Patondan böyük əmək tələb edib. Fermer hər gün bu işə altı saata qədər vaxt sərf edib. Nəhəng balqabağın gündəlik su tələbatı isə təxminən 590 litr olub.

Yaxın həftələrdə rekordçu balqabaq Sauthempton yaxınlığındakı “Sunnyfields” fermasında ziyarətçilərə nümayiş etdiriləcək. Daha sonra isə onun taleyi dəyişəcək: nəhəng tərəvəz mal-qara üçün yem kimi istifadə olunacaq.