NATO Ukraynaya silah, sursat və hərbi texnikanı alyansın mərkəzləşdirilmiş satınalma agentliyi vasitəsilə əldə etmək imkanı verəcək. Bu addım Kiyevin müdafiə təchizatını daha sürətli və daha sərfəli şəkildə təmin etməsinə şərait yarada bilər. Bu barədə Financial Times nəşri məlumat yayıb.

Ukrayna NATO-nun Dəstək və Təchizat Agentliyi (NSPA) ilə əməkdaşlığa başlayır. Tərəfdaşlıq Ukraynanın müdafiə sənayesinin Qərb müttəfiqləri ilə inteqrasiyasını gücləndirməklə yanaşı, Kiyevə ikitərəfli danışıqlardan asılı olmayan əlavə satınalma kanalı yaradacaq.

NSPA-nın əməliyyatlara dəstək üzrə direktoru Jaklin Borsbum Financial Times qəzetinə açıqlamasında bildirib ki, bu əməkdaşlıq Ukraynaya agentliyin təqdim etdiyi geniş imkanlardan yararlanmağa şərait yaradacaq.

Onun sözlərinə görə, bura satınalma sahəsində ekspert dəstəyi, təchizat xidmətləri və formalaşmış sənaye bazasına çıxış daxildir.

Borsbum qeyd edib ki, mərkəzləşdirilmiş satınalma sistemi böyük həcmdə sifarişlər hesabına xərcləri azaltmağa imkan verə bilər. Məsələn, Ukrayna 30 min dəst hərbi forma almaq istədikdə, bu sifarişin agentlik vasitəsilə həyata keçirilməsini təmin edə bilər.

Yeni əməkdaşlıq Ukrayna ilə ABŞ arasında münasibətlərin gərginləşdiyi bir dövrə təsadüf edir. Nəşrin məlumatına görə, ABŞ prezidenti Ukraynanın Rusiyadakı neft emalı zavodlarına endirdiyi zərbələri tənqid edib. ABŞ-ın xüsusi elçisi Stiv Uitkoffun Sankt-Peterburqda Rusiya prezidenti Vladimir Putinlə keçirdiyi görüş də Kiyevin müttəfiqləri arasında narahatlıq yaradıb.

Ötən həftə NSPA Kiyevdə Ukraynanın müdafiə sənayesi nümayəndələrinin iştirakı ilə tədbir təşkil edib. Tədbirdə təxminən 150 Ukrayna şirkəti iştirak edib. Agentlik yerli istehsalçılara təchizatçı kimi qeydiyyatdan keçmək və satınalma müqavilələri üzrə tenderlərdə iştirak etmək qaydalarını izah edib.

Beləliklə, NATO-nun satınalma mexanizmlərinə çıxış Ukraynanın silah və hərbi təchizat əldə etmək imkanlarını genişləndirə, eyni zamanda, yerli müdafiə sənayesi müəssisələrinin Qərb ölkələrinin təchizat zəncirinə inteqrasiyasını sürətləndirə bilər.