Çərşənbə günü Azərbaycan Müdafiə Nazirliyi ilə Türkiyənin TUSAŞ şirkəti arasında Su-25 təyyarələrinin modernləşdirilməsi layihəsi üzrə müqavilənin imzalanması mərasimi keçirilib. Bu barədə Azərbaycan Respublikası Müdafiə Nazirliyindən məlumat verilib.

İstanbulda keçirilən IDEF-23 16-cı Beynəlxalq Müdafiə Sənayesi Sərgisi çərçivəsində keçirilən imzalanma mərasimində Azərbaycan Respublikası müdafiə nazirinin müavini Aqil Qurbanov, Türkiyə Müdafiə Sənayesi Komitəsinin sədri Haluk Görgün və digər rəsmi şəxslər iştirak ediblər.

Müqavilənin əsas məqsədi “ağıllı” bombaların və Türkiyə istehsalı olan raketlərin Azərbaycan Hərbi Hava Qüvvələrinin təyyarələrinə inteqrasiyası və onların avionikasının modernləşdirilməsi üzrə işlərin həyata keçirilməsidir.

Azərbaycan Prezidenti və Türkiyə Prezidenti Rəcəb Tayyib Ərdoğanın yaxından diqqətində olan layihədə qardaş ölkənin daxili və milli imkanlarından, eləcə də müdafiə sənayesi vasitələrindən maksimum istifadə olunması nəzərdə tutulur.