Çinin regional hakimiyyət orqanları yüksək səviyyəli rəhbərlərə qərar qəbul etmə prosesində dəstək olmaq üçün DeepSeek-in süni intellektini tətbiq etməyə başlayıblar. Bu barədə RİA Novosti Çinin “Penpai” nəşrinə istinadən xəbər verir.

Quanqsi Çjuanq Muxtar Bölgəsindəki Laibin Şəhər Dairəsinin rəhbərliyinin iclasında vurğulanıb ki, bütün səviyyələrdə liderlər qərar qəbul etmək, təhlil etmək və problemlərin həlli üçün yeni texnologiyalara, o cümlədən DeepSeek kimi süni intellekt modellərinə fəal şəkildə yiyələnməli olmalıdırlar. Rəsmilər işin keyfiyyətini və səmərəliliyini artırmaq üçün “insan beyni + süni intellekt”dən istifadə etməyə çağırılıb.

Henan əyalətinin səlahiyyətliləri, həmçinin qərar qəbulunu dəstəkləmək üçün DeepSeek kimi geniş miqyaslı AI modellərinin öyrənilməsi və istifadə edilməsinin vacibliyini vurğuladılar. DeepSeek imkanları Guangdong və Hunan kimi digər bölgələrdə də tətbiq olunmağa başlayıb. Xüsusilə, Çanqşa şəhəri şəhər təhlükəsizliyinin intellektual idarə olunması üçün və mənzil, qaz, nəqliyyat, təbii fəlakətlər və ictimai təhlükəsizliklə bağlı müxtəlif ssenarilərdə süni intellektdən istifadə etməyi planlaşdırır.

Global Times-ın məlumatına görə, Shenzhen səlahiyyətliləri inzibati proseslərin səmərəliliyini artırmaq üçün DeepSeek AI əsasında 70 rəqəmsal xidmət həyata keçirib. Bu yenilik fərdiləşdirilmiş məzmunun yaradılması vaxtını beş gündən bir neçə dəqiqəyə qədər azaldıb, sorğunun işlənməsinin dəqiqliyini 95%-ə çatdırıb və xidmətlərin çatdırılmasının vaxtında aparılmasını 25% artırıb.

Çin şirkəti DeepSeek yanvarın 20-də özünün R1 modelinin versiyasını buraxdığını elan etdi. Tərtibatçıların fikrincə, onların süni intellektləri ChatGPT-dən geri qalmır.