Federika Amati — Imperial College London-un həkimi və elmi əməkdaşı xərçəngin profilaktikası üçün düzgün qidalanma ilə bağlı mühüm tövsiyələr verib. O, bu barədə Daily Mail nəşrinə danışıb.
Mütəxəssisin sözlərinə görə, ən optimal qidalanma modeli balıq, tərəvəz, meyvə və tam taxıl məhsullarına əsaslanan rasiondur. Bu yanaşma “pescetarian” pəhriz kimi tanınır. Bu pəhrizdə əsas protein mənbələri balıq və bitki mənşəli məhsullar olur, quş əti və qırmızı ət isə nadir hallarda istifadə edilir. Belə qidalanma Aralıq dənizi pəhrizi ilə oxşarlıq təşkil edir və xroniki xəstəliklərin daha aşağı riski ilə əlaqələndirilir.
Amati gündəlik menyuya ən azı üç porsiya tam taxıl məhsulu və beş və ya daha çox porsiya tərəvəz və meyvə daxil etməyi tövsiyə edir. Bundan əlavə, omeqa-3 yağ turşuları ilə zəngin qidalar — yağlı balıq, kətan toxumu və qoz — rasionun vacib hissəsi olmalıdır.
Həkim həmçinin liflə zəngin qidaların — lobya, mərcimək və digər paxlalıların — mütəmadi qəbulunu məsləhət görür. Onun sözlərinə görə, bu məhsullar bağırsaq mikrobiomunun müxtəlifliyini qorumağa kömək edir ki, bu da immun sisteminin düzgün işləməsində mühüm rol oynayır.
Bununla yanaşı, mütəxəssis vurğulayır ki, emal olunmuş ət və yarımfabrikatların qəbulu maksimum dərəcədə məhdudlaşdırılmalıdır. Belə qidalanma tərzi sağlamlığın qorunmasına kömək edir və onkoloji xəstəliklərin yaranma riskini azalda bilər.