İsrailin Baş naziri Benyamin Netanyahu İranla bağlı münaqişə fonunda ABŞ Prezidenti Donald Trampla münasibətlərdə daha ehtiyatlı mövqe tutmağa başlayıb. “Politico” nəşri bu barədə ABŞ və İsrail rəsmilərinə istinadən məlumat yayıb.

Nəşrin məlumatına görə, Netanyahu artıq Trampdan konkret addımlar tələb etmək əvəzinə, ona məsləhətlər və məlumatlar təqdim etməyə üstünlük verir.

“Netanyahu hər hansı konkret tədbirin görülməsini tələb etməkdən çəkinir, bunun əvəzinə mümkün variantlar barədə məsləhətlər və məlumatlar təqdim edir”, – deyə “Politico” yazıb.

Məqalədə qeyd olunur ki, bu yanaşma Netanyahu üçün Tramp ilə ünsiyyətdə daha ehtiyatlı və təmkinli olmasının faktiki olaraq səssiz etirafı kimi qiymətləndirilə bilər. İsrailli yüksək vəzifəli şəxsin sözlərinə görə, Netanyahu Ağ Evdə Trampla görüş zamanı konkret addımın atılmasını istəmək əvəzinə, mümkün inkişaf ssenarilərinin hamısını sadalayıb.

Ağ Evdən olan rəsmi şəxs nəşrə açıqlamasında bildirib ki, İsrail tərəfi qərarların Tramp tərəfindən verildiyini anlayır və buna görə də ABŞ prezidentindən hər hansı bir tələb irəli sürürmüş kimi görünməmək üçün daha ehtiyatlı davranır.

Tramp və Netanyahu arasında görüş iyulun 28-də Ağ Evdə keçirilib və təxminən bir saat yarım davam edib.

“The Wall Street Journal” qəzetinin diqqətinə görə, İranla müharibənin uzanması fonunda Tramp Netanyahu ilə əvvəlki görüşlərdə olduğu qədər səmimi davranmayıb. Bununla belə, Ağ Evin görüşlə bağlı rəsmi açıqlamasında danışıqların müsbət və məhsuldar atmosferdə keçdiyi bildirilib.