"Sergey Lavrovun İrəvana getdiyi gün "Hadrut erməniləri”nin Ermənistan Xarici İşlər Nazirliyinin önündə aksiya keçirməsi təsadüfi deyil. Ermənilər sülhməramlıların nəzarət etdiyi ərazilərə yox, məhz Hadruta qayıtmağı tələb edirlər”.

Sfera.az-ın məlumatına görə, bunu siyasi şərhçi Asif Nərimanlı deyib. O qeyd edib ki, bu, rusların erməni qoşunların Qarabağda çıxarılmasından sonra ehtiyatda saxladıqları "Hadrut planı”nın tərkib hissəsidir:

"Çünki ermənilərin Hadruta qayıtması rus sülhməramlılarının da bu əraziyə daxil olması deməkdir və burada iki hədəf var. Birincisi, siyasi hədəf - ermənilərin Hadruta qayıtması "status” məsələsində perspektiv imkanlar yarada bilər. İkincisi, hərbi hədəf - Hadrut Şuşa, Laçın, Xankəndi ilə sərhəddir.

Azərbaycan ordusunun bu bölgədəki mövqeyi ermənilərin yaşayacağı Xankəndi və Xocavəndin bir hissəsinə nəzarət imkanı verir. Ermənilər qayıdarsa və Hadrutda rus sülhməramlıları yerləşərsə, Rusiya bütün Araz boyu istiqamətinə - Cəbrayıl, Füzuli, Qubadlı, Zəngilan – nəzarət etmək imkanı qazanır”.

A.Nərimanlı bildirib ki, müharibə vaxtı Ermənistana gedən bütün erməni "qaçqın”ların məhz "Hadrut uğrunda” təşkilatı ətrafında birləşməsi də buna hesablanmış addımdır: "İndi Lavrovun İrəvana gəlişi günü eyni tələblər yenidən gündəmə gətirilir. Bu isə Rusiya baş diplomatının Bakıya özündə erməni mülki əhalinin Hadruta qayıtmasını əks etdirən təkliflərlə gələcəyi ehtimalını artırır. Moskva bununla erməni qoşunların çıxarılmasından sonrakı dövrdə Qarabağda strateji üstünlük qazanmağa çalışır”.