Azərbaycan Respublikasının Gənclər və İdman Nazirliyi tərəfindən gənclər təşkilatlarının fəaliyyətlərinin dəstəklənməsi məqsədi ilə 2024-cü il üzrə elan edilmiş qrant müsabiqəsi çərçivəsinədə “Yurd” Gənclərin İntellektual İnkişafına Dəstək İctimai Birliyi tərəfindən icra olunan “Şəhərdən kəndə-səyyar intellekt marafonu” layihəsi çərçivəsində növbəti tədbir keçirilib.

QHT.az xəbər verir ki, Quba rayonunun 8 müxtəlif kənd və qəsəbə zonasında yeniyetmə və gənlərin iştirakı ilə intellektual oyunların keçirilməsini nəzərdə tutan layihənin tədbiri Quba rayonu Qaraçay qəsəbə tam orta məktəbində təşkil edilib. Yarışda Quba rayonunun Qaraçay qəsəbəsində, Alekseyevka, Zizik, İqriq, Küçeyi, Talabıqışlaq və Pirvahid kəndlərində yaşayan və təhsil alan yeniyetmə və gənclər iştirak edib.

Rəsmi açılış mərasimində çıxış edən layihə rəhbəri, “Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov qeyd edib ki, yarışın keçirilməsində əsas məqsəd Azərbaycan coğrafiyasının, flora və faunasının, tarixinin, ədəbiyyatının, mədəniyyət və incəsənətinin, tarixi şəxsiyyətlərinin, mədəniyyət və incəsənət xadimlərinin təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılmasının və asudə vaxtının səmərəli təşkil edilməsinin təmin olunmasıdır.

Seçim turunun yekununda Alekseyevka kəndini təmsil edən “RT-Team” komandası birinci, “İntellekt” komandası ikinci, Küçeyi kəndinin “Xarıbülbül” komandası isə üçüncü yeri tutub. Yarışın əsasnaməsinə uyğun olaraq ilk iki yeri tutan komandalar final mərhələsində iştirak etmək haqqı qazanıb. Yekunda qalib və mükafatçılar diplom, medal və kubokla təltif olunublar.

Qeyd edək ki, bu seçim turu ilə layihə çərçivəsində keçirilən seçim turlarına yekun vurulub və final mərhələsində iştirak edəcək 16 komanda müəyyən edilib. Beləliklə, Quba rayonu Birinci Nügədi kəndində keçiriləcək final mərhələsində Rustov kəndininin “Zəfər”, Çiçi kəndinin “Qartallar”, Dağlı kəndinin “Ekipaj”, Küpçal kəndinin “Zəfər” , Susay kəndinin “Susay”, Digah kəndinin “Uğur”, Qımılqışlaq kəndinin “Qımılqışlaq”, Əliməmmədoba kəndinin “Ultimatum”, İkinci Nügədi kəndinin “Azman”, Birinci Nügədi kəndinin “İntellekt”, İsnovqışlaq kəndinin “Zirvə”, Mirzəqışlaq kəndinin “Zəka”, Zərdabi qəsəbəsinin “İstiqlal”, Barlı qəsəbəsinin “Viktoriya”, Alekseyevka kəndinin “RT-Team” və Quba şəhərinin “İntellekt” komandaları mübarizə aparacaq.