İndi hamı DİM imtahanlarının çətinliyindən danışır. Bu öz yerində.
Mənə təhsillə bağlı məzmun işlərinin aparılmasına rəhbərlik edən Təhsil İnstitunun fəaliyyəti maraqlıdır. Azadmedia.az xəbər verir ki, bu sözləri təhsil eksperti Kamran Əsədov dövlətin xaricdə təhsil üçün ayırdığı vəsaitlərin havaya sovrulmasından danışarkən deyib.
Bir neçə il əvvəldən məktəblərin inkişaf planları ilə bağlı bəh-bəhlə paylaşımlar edirdilər, məktəblərdə metodiki işin təşkili ilə bağlı layk-layk statuslar yayımlayırdılar. Bəziləri də məktəb rəhbərləri ilə bazar səhərləri yeməklərindən dadlı-dadlı şəkillər paylaşırdılar... O işlərin axırı nə oldu? - deyən ekspert - Məktəblərin tədris göstəricilərini qaldırmaq üçün şalvarlarını çirmələyib təlimlər keçirdilər, nə oldu onun axırı?

Hər il yüzlərlə müəllimi xarici ölkələrə təhsilin inkişafı, tədrisin keyfiyyətinin yüksəldilməsinə töhfə vermək üçün göndərirdiniz, hanı nəticə?

Milyonlarla manat vəsaiti qrant kimi paylaşırsınız 3 ildir, hansı nəticə əldə edildi?

Ümumiyyətlə, təhsili nə qədər bərbad vəziyyətə saldığınızdan xəbəriniz varmı?
Heç olmasa vicdan əzabı çəkirsiniz? Heç olmasa utanırsınız? - kimi haqlı, cavabsız suallar verib:

"Siz təhsilin məhv olması üçün nə lazımdır var gücünüz ilə çalışırsınız. Bax bunda ciddi nəticələri əldə etmisiz.

AGMA-ya təkcə son qrantda 200 min manat pulu bəxşiş verdiniz, hansı keyfiyyət əldə edilib?

Nazirliyin əməkdaşı deyir ki, konstruktiv müzakirəyə açıqsınız. Siz ancaq konserva müzakirəsinə açıq ola bilərsiniz. Hanı o müzakirə? Kimlə keçirilir?

Qaldığınız hər saniyə elmə, təhsilə zərərsiniz. Amma bu gün torpaq çərşənbəsidir. İnşallah, tezliklə elmdə, təhsildə tozunuz da qalmayacaq".