Quba rayonu Zərdabi qəsəbə tam orta məktəbində təşkil olunan yarışda Quba rayonunun Barlı, Bağbanlı, Zərdabi qəsəbə, Zizik, Amsarqışlaq, Qəcərzeyid kəndlərinin, eləcə də Quba Fizika, Riyaziyyat, İnformatika Təmayüllü Liseyin şagird və müəllim kollektivlərindən ibarət müxtəlif sahələrdə çalışan gənclərdən ibarət 7 komanda iştirak edib.

Tədbirin açılış mərasimində çıxış edən layihə rəhbəri, “Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov yarışın keçirilməsində əsas məqsədin 125 illik yubileyi olan Azərbaycan kinosunun gənc nəsil arasında təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılmasının və asudə vaxtının səmərəli təşkil edilməsinin təmin olunmasıdır.

Bir dövrəli dairəvi sistem üzrə keçirilən turnirdə qalib adını Bağbanlı qəəbəsini təmsil edən eyniadlı komanda qazanıb və final mərhələsində iştirak etmək hüququ əldə edib. Yarışda ikinci və üçüncü yerləri müvafiq olaraq Zərdabi qəsəbəsini təmsil edən “İstiqlal” və Barlı qəsəbəsini təmsil edən “Yenilməz batalyon“komandaları tutub. Qalib və mükafatçılar müvafiq olaraq kubok, medal, diplom və bədii ədəbiyyat nümunəli kitablarla təltif edilib.

Qeyd edək ki, Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Yurd” Gənclərin İntellektual İnkişafına Dəstək İctimai Birliyi tərəfindən icra olunan “25-ci kadr-KinoMƏNlərin intellekt savaşı” adlı layihə çərçivəsində bu günədək Siyəzən, Şabran, Xaçmaz və Qusar rayonlarında intellektual turnirlər keçirilib.